DELHI INTHLAN: CM Aiishi-i a bâng, BJP CM tur a la hriat loh

DELHI INTHLAN: CM Aiishi-i a bâng, BJP CM tur a la hriat loh
Delhi assembly inthlan vote chhiar zawk taka BJP-in chiang taka hnehna an chan hnuah chief minister ni lai, Atishi chuan Pathianni khan Lieutenant Governor V K Saxena hmuin a bânna lehkha a thehlut a. Saxena pawhin 7th Legislative Assembly chu a thiat nghal.
BJP hian inthlanah khan bial 70 awmah bial 48 lain inthlan hnuhnung ber, kum 2020-a MLA pariat chauh an neih atangin an pung hle a. AAP chuan bial 62 an vawn lai atangin 40 zet an hloh thung a, Congress phei chuan MLA an nei lo.
AAP tan chuan tun inthlan hi ‘chhiatna lian tak’ a ni a, an national convener Arvind Kejriwal bakah an hruaitu lawk – Manish Sisodia leh Saurabh Bharadwaj te pawh an chak lo va. Atishi erawhin Kalkaji bial a la hum hram.
BJP hian kum 27 zet hnuah Delhi-ah ro an rel leh dawn ta a. Prime Minister Narendra Modi chuan an party worker-te lawmpuiin Delhi voter-te hnenah lawm thu a sawi a. BJP chuan an intiamna an tipuitling ang a, Delhi chu hmasawnna kawngah an kalpui dawn tih a sawi.
BJP sorkar thar hi US-a zin mek prime minister haw hnuah neih tur nia sawi a ni a. An kaihhruai tangrual, NDA rorelna state chief minister-te pawh sawm an ni dawn nia sawi a ni.
Pathianni khan Union Home Minister Amit Shah leh BJP National President JP Nadda te chu sorkarna siam dan turah an inkawm a. Prime Minister Modi pawhin a zinna atangin Inrinni zan khan Shah leh Nadda te hi a be bawk.
Bânna thehlut ta, Atishi-i hi Delhi chief minister thutthlengah thla nga dawn a thu hman a. September thla khan ei ruk thubuaia man leh bail-a chhuah, Kejriwal-a a bân rualin a thlak a. An hotupa hian chanvo sang ber chu ‘mipui court-a tihfel a nih hnuah’ chauh a chelh leh dawn tih a sawi.
AAP chet chhiat leh New Delhi-a a bial a hum zawh loh hnuah Kejriwal chuan mipui thutlukna siam chu a pawm tih a sawi a. “Delhi inthlana mipui thutlukna hi ka pawm a. BJP ka lawmpui a, hnehna petu mipuite beiseina leh rinna ang ngeia an kal ka beisei,” a ti.
BJP hruaitute chuan tu nge chief minister ni dawn tih an la puang lo va, Kejriwal hnehtu, New Delhi bialtu MLA thar, Parvesh Verma chu AAP national convener meuh a hneh hnuah a hming a ri ring nghal hle.
West Delhi atanga MP pawh vawi hnih lo ni tawh, Verma-a hi nikuma parliament inthlanah khan a ding duh lo va. Assembly inthlan lamah kalin a bial ngaia vawi thum lo tling zawn tawh, Kejriwal bitumin vote 4,000 velin a hneh a. Amah hi Delhi chief minister lo ni tawh, Sahib Singh Verma-a fapa a ni.