Moscow-ah Russia-in Ukraine a rûn tantu langsar that
Ukraine khawchhak lama Russian paramilitary tantu langsar tak hruaitu chu Moscow-a thil puak avanga hliam tuarin Thawhtanni tuk khan a thi tih Russian chanchinbuten an puang.
Armen Sargsyan-a hi ‘Arbat’ battalion hotu niin Moscow hmarthlang lam, Kremlin atanga km 12 vela hlaa chenna in luhka puia thil puakah na takin a inhliam a ni.
Helicopter-in damdawi in panpui niin intensive care-ah dah nghal a ni a; mahse, a hnuah a thi zui ta niin Telegram rintlak takin a tar lang.
Sargsyan-a vengtu pakhat telin mi dangte pawhin hliam an tuar na hle hlawm a, pakhat a thi zui bawk niin an sawi.
Ukraine chuan he thil thlengah hian aw a la chhuah lo.
December khan Ukrainian security service SBU chuan ‘crime boss’ Sargsyan-a hi ‘Ukraine do turin lung in tangte a chhawr’ nia rinhlelh a nih thu an lo sawi tawh a. May, 2014 atang khan Kyiv lailia inthahnaa a inhnamhnawih avangin international wanted list-ah telh a ni bawk tih an sawi.
SBU chuan Sargsyan-a hi Ukrainian president hlui tlan chhe mek, Viktor Yanukovych-a thuihhruai zinga mi niin an sawi bawk.
“Sargsyan-a thah tumna hi uluk taka ruahman a ni a, chhuituten tunge a phena inrawlh an chhui mek,” tiin dan kengkawhtu hotu sawi chu TASS-in a tar lang.
Social media-a thlalak darhah chuan in luhna nasa taka chhia leh tukverh tlabal neih nuaihte hmuh theih a ni.
Sargsyan-a hi Horlivka, Donetsk region, Ukraine-a piang niin he hmun hi kum 2014 atanga Russia-in an luah a ni.
‘Arbat’ battalion hi Russia-a Kursk region-a che an ni deuh ber a, he hmun hi Ukrainian sipaiten August thlaa an beih thut atanga an awmchilh kha a ni.
Russia-in Ukraine a rûn mek thlawptu mi langsar tak tak hi Moscow leh an luah hmunah beih an lo tawk fo tawh a. Russian naval officer Valery Trankovsky leh Russian prison boss Sergei Yevsyukov chu kum 2024 tawp lam khan Russian luah Ukraine-ah car bomb hmanga thah an ni.
December khan Russian sipaia general lawk tak leh a assistant chu Moscow-ah Ukraine-a security service-in an that bawk.
Moscow-ah Russia-in Ukraine a rûn tantu langsar that
Get real time updates directly on you device, subscribe now.