Demand Reduction lamah…

Ruihhlo ngaite enkawlna Jordan Centre, Sethawn chu Synod kuta a awm hnuah tun hnai khan hawn a ni ta a. He ruihhlo ngaite enkawlna hmun Jordan centre hi tunhma atang tawha chanchin ngah ve tak a ni a; mahse, chu lam chu kan umzui dawn lo.
Ruihhlo ngai an lo awmin, kawng hrang hrangin chhungkua, khawtlang leh sawrkarin kan tuar a, ruihhlo leh ruihhlo ngaite avanga tawrhna leh harsatna thleng zozai hi sawifiah vak ngai lova tu te pawhin a taka kan tawn mek a ni. Ruihhlo ngai an lo awm hnua a buaipui zuina lamah tha kan seng nasain, sum leh pai pawh kan sengso nasa a, kan buaipui luai luai ta mai thin a ni a. Chutih laiin a tobul lam, he thil tha lo tak a lo chawr chhuahna bul ber ‘chhungkua’ atanga tanlakna lamah erawh tha kan thawh nasa leh mang si lo niin a lang.
Ruihhlo kaihhnawih sawi apiangin, supply reduction tih te, demand reduction tih te hi sawi chhuah tam pawl tak a ni awm e. “Supply a awm chhan ber chu demand a awm vang a ni a, demand tihtlem emaw tih reh emaw chu, ruihhlo do nana step pawimawh, step tangkai leh step sawt ber a ni,” kan han ti hluai thin a, thudik tak a ni; mahse, ruihhlo ngaite an pung tual tual si. Chumi awmzia chu, demand reduction lamah hma kan la chak lova, chu miin a hrin chhuah chu supply a lo pung a, supply reduction lamah tha pui kan chhuah a lo ngai a, chu chu ‘hmalakna ropui tak’ anga lang, mahse a sawtna awm mang si lo a ni.
Tunah pawh, a ler lama thuaina chi khat, ruihhlo ngaite enkawlna Centre chungchang kan buaipui luai luai a, ‘kohhran leh sawrkar thawhdunna’ te kan ti a, tha leh zung, sum leh pai tam tak a ral huau huau a. Heng zawng zawng a lo thlen chhan chu, saw laia chhungkaw pakhat saw a ni. A tirah chuan meisi a de set set a, ngaih pawimawh thamah kan ruat lova, kan ngaihthah a; mahse, thli thawin meisi chu a chhem ling reng a, meisi ling reng na na na chuan engtikah emaw thil dang a kan kai hun a lo awm a, a tawpah a rawn alh chhuak hluai a. Kangmei thelh nan tui (Centre/Home/sum leh pai etc) kan chelek a lo ngai ta thin a ni.
Hei hi Centre sawi hnawmna leh sawi nepna a ni lova, ruihhlo ngaite enkawlna Centre/Home chu neih makmawh a ni, chutih rualin, Centre/Home din nana kan inhuam thin dan let hnih let thum te hi demand reduction atan ruahman thin ila, tuna kan buaina tam zawk hi chu kan pumpelh ngeiin a rinawm.