Dengue leh Fogging

State Vector Borne Disease Control Programe lam chuan Dengue natna thehdarhtu thosi tialte chu fogging hmanga tihhlum theih ni mah se, thosi note erawh a tihhlum ve theih loh avangin thosi pian theihna hmunhma thenfai hmasak a pawimawh tih an sawi a.
Tunhmain thuneitu lawk thenkhat ten anmahni bial chhungah hmunhma thianfai hmasa lovin nawrtu an awm avangin fogging an lo tihtir thin a, chu chu a sawt lo hle tih an sawi a. Tun chinah chuan eng ‘pressure’ pawh awm mah se, thosi pian theihna thenfai hmasak loh chuan fogging (thosi hlo phuh) an kalpui tawh dawn lo tih tunhnai khan thuthar thehdarthtute hnenah an sawi a ni.
Dengue hi Mizoramah kum 10 vel kalta atanga hmuhchhuah kha a ni a, thihpui an awm ve ta nual mai a. Nikum maiah pawh dengue vei 1868 zet hmuhchhuah niin mi 5 laiin an thihpui a. Thisen endik zinga a zahve zetin dengue hi an vei a ni. Kuminah hian dengue vei hi June thlenga thisen endik 2897 zingah 220 an awm tawh a, kum tin June-Nov inkar hi a hluar hun lai a nih avangin, tun atanga tanlak a ngai tihna a ni.
A buaipuitute lamin fogging hman dan, a sawt dan leh sawt loh dan an sawifiah tawh a. Fogging tih dawn pawhin a tihna hmun tur veng/khua/thler ten thosi pian theihna tuitling leh bawlhhlawh hnawng etc. an lo thenfai phawt a ngai dawn tihna a ni.
Fogging tih dawn vang pawh ni lovin mahni khua, veng thenfai hnatlang hi chu kan lo tih than a ni theuh awm e. Fogging tih theihna tura veng/khua thianfaia hnatlan phei chu a phurawm lehzual dawn a, mithiamten natna tihbaiawm tak laka invenna tur leh fihhlim theihna tura tihtur an sawi hi tum hnih khat hnatlanga hlawh chhuah mai theih a ni dawn a, chu chu khawtlang hriselna, faina leh thianghlimna a ni nghal dawn bawk si a, hnatlanna hlawk tak a ni dawn tihna a ni.