Denmark lal fapa pianchampha lawmnaah Cinderella-i’n a pheikhawk a theihnghilh

Denmark lal fapa, Prince Christian kum 18 tlin champha lawmna Christiansborg Palace, Copenhagen-ah October ni 15 khan an nei a, he pianchampha lawmnaah hian a boruak pawh a tho thang tha halh halh hle a ni ngei ang, an mi sawm te an haw darh hnuah hmeichhe pheikhawk khing an chhar ta nawlh mai a, Danish Royal House chuan hei hi a hlimawm zawngin boruak siam nan an hmang zui ta a ni.
Lal chhungkaw lam chuan October ni 16 khan social media-ah hmeichhe pheikhawk khing, rangkachak rawng tle deuh sep sep chu a thlalak post-in, “Nizana pheikhawk theihnghilhtu kha Cinderella i ni mial em?” an ti a, “Nimin a lalnu zahawm ruai buatsaih kiltute an tin hnu khan, he pheikhawk keartui sang hi khawhar takin Christiansborg Castle-ah hnutchhiah a ni. A neituin a hmuh leh theih nan min rawn be pawp dawn nia,” an ti bawk.
Mai leh chaihchim sakawr tawlailira chang ta te chu hmuh tur awm ve lo mah se he pianchampha lawmnaah hian a tak rama Cinderella hian nuam a ti hle a ni ang tih chu a rin theih mai e, pheikhawk khing bun loin a haw a nia!
Prince Christian pianchampha lawmnaah hian Princess Elisabeth, kum 21, (Belgium), Princess Catharina-Amalia, kum 19 (Netherlands), Princess Ingrid Alexandra, kum 19 (Norway) leh Princess Estelle, kum 11 (Sweden) te pawh an tel a ni.