EPL hmahruaitu thar Arsenal

October 4, Inrinni zan khan English Premier League khelh chhunzawm a ni a, Arsenal an chak laiin Liverpool an tlawm. West Ham lakah Arsenal an chak laiin Chelsea lakah Liverpool an tlawm vangin table-a hmahruaitu a inthlak danglam a, Arsenal chu hmahruaitu thar an ni.
Arsenal an kal zel
Season thara inelna hrang hranga khel tha Arsenal chuan an mual Emirates Stadium-ah season kal meka talbuai, table mawng ber dawttu-a awm mek West Ham United an mikhual. London derby-ah Gunners an khel tha a, inkhel thunun tluan chungin si hnih faiin hnehna an chang. West Ham lakah chak bawk mah se Arsenal captain Martin Odegaard a inhliam nawn leh a, chawlhlawk hmain thlak a ngai. Odegaard inhliam nawn leh hi Arsenal tan chanchin lawm lo tak mai a ni a, ngui rawihna tham a ni.
Arsenal in an mualah goal thun ngei tumin tan an khawh a, West Ham in an goal vengin point hlawhchhuah hram tumin tan an khawh ve thung. Beisei anga goal lut a awm lawk theih loh hnuin Arsenal in goal an thun ta nge nge. Minute 35-naah West Ham captain hlui Declan Rice chuan a club hlui lakah Arsenal hmahruaina goal a thun. Rice goal thun hmangin Gunners hian si khat faia hmahruai chungin chawlhlawk an hmang.
Chawlhlawk hnu lamah Arsenal an khel tha chhunzawm a, an mikhualte an nawr bet hle. An mikhualte nawr bet viau mah se goal erawh an thun belh mai thei bik lo thung a, goal thun belh turin Hammers chetsual an ngahchhuah a ngaih. An si phurh sut mamamawh West Ham in penalty an chawi. He penalty hi Bukayo Saka chuan minute 67-naah chiang zetin a pet goal a, an goal hnihna a thun.
Saka goal thun hnuin inkhel a hmuhnawm zui viau a, West Ham tan an goal ven ngawt a theih tawh lova, phurh belh huamin an khingpuite an nawr. Goal thun mamawh viau mah se West Ham hian hun tawp thlengin an si phurh a sut thei lo. London derby hmuhnawm takah hian hun tawp thlengin goal dang a luh belh thei tawh lova, Atsenal chuan an mualah 2-0 a hnehna changin point thum hlu tak an hmu.
Liverpool an tlawm
Inrinni zana inkhel dangah hmahruaitu Liverpool chu mikhual an nihna hmun; Stamford Bridge-ah an tlawm. An khelh hnuhnung pahnihah an tlawm zawn vangin champion lai Liverpool hian an hmahruaina an hloh zui ta hial a ni.
Season tharah beisei anga khel tha tluang tak tak thei lo Chelsea hian Liverpool lakah bul an tan tha viau a, inkhel tan atanga minute 14-na lekah Moisés Caicedo chuan hmahruaina goal a thun nghal. Hma takah goal thun bawk mah se Blues in goal dang an thun belh thei lo reng a, goal an chuah ta hial zawk. Liverpool tan Gody Gakpo chuan minute 63-naah goal thunin an si phurh an sut.
1-1 a nih hnuin inkhel a hmuhnawm zui viau a, goal pawh a luh belh thei lawk lo. Team lian pahnihte hi an inhnehtawk mai dawna a lan hnuin Chelsea tan Estêvão chuan minute 90’+5-naah hma an hruai nawn lehna goal a thun a. He goal hmang hian champion lai Liverpool lakah hnehna changin point thum hlu tak an hmu zui ta a ni.
Hmahruaitu thar Arsenal’
Chelsea lakah Liverpool an tlawm vangin Arsenal chu EPL a hmahruaitu thar an ni. Gunners hian khelh 7 atangin point 16 an hmu a, point khatin Liverpool an lehpel. Reds hi Crystal Palace laka an tlawm hnuin Chelsea lakah an tlawm zui leh a, an hmahruaina an hloh zui ta a ni. Reds hnehtu Chelsea hian parukna an luah a, hma an sawn hret hret zel.