Developed ram ni turin 8-9% growth ngai

India chuan kum 2047-a Prime Minister Narendra Modi hmathlir anga developed nation ni tur chuan tun atanga kum 20 chhung vel chu kum tinin economic growth 8-9% a neih a ngai tiin Deloitte South Asia CEO Romal Shetty chuan a sawi.
India chuan ‘China plus one’ strategy avangin hlawkna a nei thei tia sawiin China ram len leh mipui ang nei ngah chu India chauh a ni a ti bawk a.
Space sector lamah pawh India chuan start-ips 200 chuang nei tawhin kum 2040-ah chuan investment $ 100 billion vel a hmu thei tawh ang a ti bawk a.
“Developed economy nih a, middle income level kalsan tur chuan kum 2047 thlengin economic growth 8-9% neih a ngai a. Chutiang chu thil awlsama ni hauh lova, kum tina 809% growth hmu thei chu ram tlemte chauh an ni,” tiin Shetty chuan a sawi bawk.
Tun hnai lawka PTI tena Prime Minister Narendra Modi-an interview naah India chu hun rei lo te hnuah top three economy-ah a inhlangkai dawn a ti a. “Kum 2027-ah chuan India chu developed ram a ni tawh ang a. Kan economy chu huapzo leh innovative zawk a ni ang,” tiin PM Modi chuan a sawi.
India hi tunah khawvela economy lian ber pangana ni mek niin US, China, Japan leh Germany te a tluk lo va. S&P Global report chuan thla kalta khan India economy chu kum 2031 ah $ 6.7 trillion a kai hman an rin thu an sawi.
Shetty chuan India chuan agriculture, space sector leh sunrise area tih mai heng semi-conductor leh electric vehicles lamah theihna nasa tak a nei a ti bawk a. India chuan kawngpui chak taka sial mekin kum khatah 16,000-18,000 km vel a sial hman a, hei hian hmasawnna leh sumdawnna a tichak dawn a ni tiin a sawi bawk a.
“Multinational company te chuan ‘China plus one’ an zawng mek a. China chhuahsana ram dang an panna kawngah ram tam takin hlawkna an chan ngei dawn a, mahse, India aia dinhmun nei tha an awm lo,” tiin Shetty chuan a sawi bawk.