Sipaia sum seng tam pangana India, 2024 aiin 8.9%-in hmang tam

Stockholm International Peace Research Institute (Sipri)-in Thawhtannia report a tihchhuahah India chu kum 2025 chhunga US, China, Russia leh Germany dawta khawvela sipai kaihhnawiha sum hmang tam pangana a ni a, khawvel puma sipai tana sum hman zat atanga 3.2% a hmang.
Nikum khan India sipai sum hman zat chu dollar tluklehdingawn 92.1 a ni a, kum hmasa aiin 8.9%-in a tam zak niin a tar lang a. India-in Pakistan laka Operation Sindoor a kalpui khan sipaite chuan indona atana inpeih reng turin emergency procurements raft (hmanhmawh taka ralthuam leina tur) an siam nasa a ni.
Sipri-in a chhinchhiah dan chuan India thenawm ramte pawhin sipaia sum an hman a pung a. Hmang tam pahnihna, China sum hman zat chu 7.4%-in a tipung a, dollar tluklehdingawn 336 a tling a; Pakistan hman zat chu 11%-a pungin $tld 11.9 a hmang a, sum hmang tam ram zingah 31-na a ni.
Sipaia sum hmang tam ber pathum – USA, China leh Russia sum hman zawng zawng chu $tld 1,480 a ni a, hei hi khawvel puma hman zawng zawng atanga 51% a tling niin Sipri chuan a tar lang a. Kum 2025 khan khawvel puma sipaia sum hman zat chu $tld 2,887-ah a pung a ni.
“Khawvel puma sipai kaihhnawiha sum hman pungah hian Europe chu a hma kum aia hmang tam ber an ni a, 14%-in a pung a. Russia leh Ukraine chuan kum li an indo tawh chungin an insen belh zel a, European NATO member ramte pawh inseng nasain Cold War hnua Europe laili leh thlang lam ramten sum hman a pun nasat ber hun a ni,” tiin report-ah hian tar lan a ni.
Sum hmang tam zinga India a tel mek lai hian ram dang atanga ralthuam lak luhah erawh a tlakhniam lai a ni.
Kum 2016-20 leh 2021-25 inkar khan India-in ralthuam a lak luh chu 4%-in a tlahniam a, heti chung hian khawvela sipai thil la lut tam pahnihna a la ni tho va, khawvel puma ralthuam lak luh zinga 8.2% chu India-in a lei niin March thla khan Sipri chuan a tar lang.
India-in ralthuam a lak luh chhan hi China leh Pakistan nena an inkar a that loh vang niin ‘Trends in International Arms Transfers’ tih report chuan a tar lang bawk.
Kum 10 kalta chhung khan India chuan Russia atangin ralthuam a lak luh thin hawisan deuhvin khawthlang a hawi a, a bik takin France, Israel leh US lam a pan niin March thla report-a kum nga chhunga data an tihchhuahah tar lan a ni.
“Kum 2021-25 chhunga India-a ralthuam lak luh tam ber chu Russia atanga lut a ni a, 40% a ni a. Kum 2016-20 (51%) aiin a tlem zawk a, kum 2011-15 (70%) chanve vel a ni a. India hian khawthlang lam a hawi nasa hle a ni,” an ti.