DiasporaHub hman dan tur sawiho

DiasporaHub hman dan tur sawiho
Chief Minister Office-a Mizo Diaspora Cell chu Mizoram pawna Mizo Welfare leh Association hrang hrangte nen Thawhlehni khan inbiak hmuh theihna hmangin an inkawm a. Mizo Diaspora Cell hnathawh leh Mizo DiasporaHub hman tangkai dan tur an sawiho.
Mizo Diaspora Cell (MDC) chairman Vanlaldina Fanai hoin MDC member-te hi an thu a, India ram chhung leh ram pawna awmten online-in an lo zawm a ni.
Chairman chuan Welfare leh Association hruaitute chu Mizo DiasporaHub-a inziaklut tura sawmin, sawrkar chuan an tana awlsamna tam tak a thlensak beiseiin he application hi a siam a. Inziaklut theuh turin an duh a, hmang ngei turin tumah an phut lui lo thung tih a sawi. A hmangtuten an tangkaipui lehzual theihnan a tul anga siamthat zel an inhuam tih a sawi a ni.
Mizo Diaspora Cell din chhan chu, khawvel hmun hrang hranga awm Mizote inhuikhawm a, a tul huna intanpui a ni a. Harsatna tawk, a bikin ram pawn lama awm mi engemawzat an tanpui tawh a, an tanpui mek bawk a, a tul apiang an tanpui zel dawn tih sawi a ni. Mizoram pawna chenghote hlim leh thlamuang taka awm turin an duh tih sawi a ni bawk.
DiasporaHub chungchanga hriat duh an neih hrang hrang hrilhfiah an nih bakah tangkai zawka hman theih dan tur rawtna an neih an sawiho.