DIET mi ni lo DIET quarter-ah awm

District Institute of Education & Training (DIET) Aizawla thawktute ho chenna tura quarters sakah DIET-a thawk lo, chief minister Lalduhoma campaigner, ZPM mi a awm ve tih Congress Thalai chuan an saiw a. Kalphung thar sawrkarah party mi induhsakna uchuak taka kalpui a ni tih an sawi.
Congress Thalai Hqrs. hruaitute sawi danin, Thawhlehni khan DIET Aizawl principal leh thawktute chenna in (quarters) tlawhin, DIET quarter-a cheng tur ni lo, chief minister Pu Lalduhoma campaigner a awm ve tih an hmuhchhuah thu a sawi. Quarters hi DIET hotute kuta hlan tawh niin, staff-te chenna tura ruahman a ni a; staff quarter indaih lohna a nasa hle tih a sawi bawk.
Thu an zawhfiahna atanga a lan danin, he quarters-a awm hming tumtu hi ZPM party-a Political Affairs Committee member ni tawh leh tuna adviser ni mek Lalthansanga a ni a. An chhungkaw member zingah sawrkar hnathawk emaw, DIET-a thawk emaw sawi tur an awm lo tih an finfiah tih an sawi. ‘Chief minister Pu Lalduhoma sawipui leh awm tir a nih thu kan dawng,’ an ti.
Congress Thalai president Laltawnliana chuan ZPM-in an sawrkar hmaa an insawi ang ni lo, “lal ngai lo lal a nâ, an lal a kha” tih anga ro an rel leh thin chu a pawi hle tih a sawi a. “Rinawm hmel takin mipuiah an inzuar a, an hun a thleng ta maw tihah dawt ringawt hmanga an kal hi an demawm takzet. Kalphung thar chet dan avang hian Mizoram mipui tan ZPM party hi thlawp reng tlak an ni loa, an chet duh dan tam tak lo thlir ve zel turin mipui ka chah a ni,” a ti.
Luah tur ni loin DIET quarters an luah chu pawi a tih thu sawiin, a rang thei ang bera inthiar chhuak turin an ngen tih a sawi a. An chhuah leh chhuah loh an enzui zel dawn tih a sawi a ni.