DIG-in state police thawhpui thiam turin CAPF hotute hrilh

Deputy Inspector General of Police (Southern Range) C Lalthanmawia chuan Lunglei district-a central armed police forces (CAPF) awmte chu Thawhtanni khan Lungleiah a kawm a, 20 Assam Rifles (Lunglawn), 20th Bn BSF (Zotlang) leh 184th Bn BSF (Melte) a commandant theuh telin thu hrang hrang an sawiho.
DIG (SR) chuan CAPF ho chu Mizote culture leh kalphung zahthiam sak turin a ngen a, Commandant-te chu ramri hrula buaina tenau awm thin chu a thlenna khuaa khawtlang hruaitute nena thawkho a, inremna kawng zawng thin turin a fuih. Hnathawh ho kawngah CAPF leh state police-ten an thu hriatte inhrilh tawn fo a pawimawh, tiin, heng kawngah hian state police leh an thawhpui (sister agencies) te chu thlatin thutkhawm a that thu te leh hemi bawhzuina kawngah intihhlimna pawh a khat tawka neih a that a rin thu a sawi.
CAPF hoin mahni thua state police-te hrilhhre hmasa loa operation nei mai thin lo turin C Lalthanmawia hian a chah a. Hei hi chu kalhmang diklo a ni tih sawiin, AR, BSF, state Police, Excise & Narcotics leh Forest department leh department dangte pawh a tul ang zela thawkho a, joint operation neih ni thei se a duh thu a sawi a ni.
Force mi leh sa lakah OC/SHO ten awlsam taka FIR thehlut mai loa, an commanding officer-te hnenah hrilhhriat hmasak thin nise tih te an thurel zingah a tel.