Dik vak loa hna laa inpuh hi a na Insawipui vanga lak kan la nei lo – MSSSB chairman

The Aizawl Post-in a zawhnaah C Lalhuliana chuan hna an lak tawhte chu a dik tawk tih a sawi a. “Hna diltu zingah hotu lian atangin kan hnena sawipuitu awm thin mah se, a tling leh tlakte chauh kan la thin,” a ti. Chu’ng miten an sawipui avanga tling pakhatmah an awm lo tih sawiin, dik tak leh uluk taka an kalpui thin tih a sawi. MSSSB-in hna a lak rualin department thenkhatin an department-a thawktu tur an la ve thin a, chu’ng mite hna lak chu mi’in MSSSB lak emaw tiin, sawichhiatna an tawh thin thu leh an ni chuan Group B chauh an lak thin thu a sawi.
MSSSB-a thawktuten theihtawp chhuah chunga dik leh uluk taka hna lak an kalpui laiin, department dang hna lak nen an ngaih pawlh thin avanga fair lo taka hna la thina an puhna chu na a tih thu a sawi a. Thiah a nih hma in uluk lehzualin MSSSB chu zirchiang hmasa ngei se a duh tih a sawi a ni.
Zawhna chhangin, sawrkarin MSSSB a thiah hun tur an hre loa, thiah tum thu official-a hriattirna an la dawng lo tih a sawi. Chief minister-in MSSSB thiah a nih tur thu a sawi chu an hriat chin a ni a, hna lak tur advertisement an tih chhuah tawh pawh hma an la zui ngam tawh loa, exam an lo buatsaih laklawh tawhte chu thuthar awm hma chuan kaltlangpui an tum tih MSSSB chairman hian a sawi.

MSSSB-in 2020-2023 inkara
Group B chin a lak dan:
4 Direct Recruitment Examination, Limited Departmental Examinations leh Departmental Examination hmangin a la a, chu’ng zingah chuan direct recruitment-in mi 111 a la hman.
4 Kum 2020-2021 khan direct recruitment-a lak an awm loa, kum 2021-2022 chhung khan staff nurse 26, stenographer grade III 5 leh junior scientific officer 1, an vaiin mi 32 a la.
4 Kum 2022- 2023 chhung khan department hrang hranga thawk tur, Combined Graduate Level 24, UDC 11, asst. accounts officer 9 leh assistant grade 35 a la.