Direct funding that zawkna lam hlir kan hria – Lalduhoma

ZPM chuan direct funding pawina lam niloin, a that zawkna lam hlir an hria tih an party leader Lalduhoma chuan a sawi.
Thawhtannia an party office-a inkhawmah ZPM leader chuan central-a Congress a sawrkar laiin direct funding tia an sawi ho – CSS leh a peng hrang hrang awmah Mizoram sawrkar kaltlang loin anmahni, a implementing agency-ah direct tak takin an rawn pe thin a, state sawrkarin a hriatpui hleithei loa. Tuna BJP sawrkar hian chu chu tidanglamin, direct funding chu a ngaia la awm thoin, state sawkar kaltlang turin a ti a. CSS sum lokal reng reng chu state sawrkarah lutin, state consolidated fund-ah a lut phawt a, a lo lut tawh chin ang phei chu budget-ah pawh lantir thin a ni tih a sawi.
Direct funding a nih miau avangin state sawrkarin a lo hman ngawt theih a ni loa, a dawngtu turte hnenah pek zel tur niin, pekchhuah theih hun chhung bituka a pek loh chuan sawrkarin a pung a chawi a ngai a. Chu chu direct funding thatna chu a ni tih a sawi bawk.
“Direct funding dawng reng reng khan Mizoram sawrkar a rawn paltlang taknaa, state-in rei a kawl thiang loa, a dawngtu tur hnenah a hlanchhawng zel tur a ni. Financial management tihchhuah tharah phei chuan ni 21 chhungin an hlan zel tur a ni, tih a ni a; ni 21 chhunga a dawngtu tur kuta an hlan loh chuan a pung an chawi ang tih mai ni tawh loin, kan chhuhsak leh ang che u, tih a ni hial. State sawrkarin thildangah lo pawtpeng pawh nise, central-in a chhuhsak leh dawn tihna a ni a, chhuhsak leh mai kha a ni loa, a dawt leh kha a lokal leh thei dawn lo tihna a ni,” Lalduhoma hian a ti.
Mizoramin direct funding a dawn mek zingah local council leh AMC – urban local bodies (ULBs) leh village council – rural local bodies (RLBs) chuan direct-in central atangin sum an dawng tawh a. Sawrkar kum kal mek, budget thara an dawn tur zawng zawng chu direct funding ni lo se, state sum atanga pek sen a ni dawn loa, inenkawl hleihtheih a ni dawn lo tih a sawi a. Central atanga an dawn piahlamah state sum thawhchhuah (state own tax revenue) atanga pek ve tur tlemte kan neih pawh state sawrkarin a pek belh hleithei lo niin ZPM hruaitu hian a sawi.
“Direct funding-a heti zat kan local bodies-ten an lo dawng hi a zangkhai thlak em em a, engmah a pawina a awm loa, a that zawkna lam hlir kan hria. Kan ADC pathumte pawh hian AMC angte, LC angte hian direct-in an sum hi central atanga dawn ve an duh a. Chu chu direct funding an tih chu a ni,” a ti.
Nikum lam daih tawh khan ZPM PAC chuan ngaihtuahin, an sawrkar a nih a, central-in an ngaihdan a zawt a nih chuan, tha takin an lo chhang ang, tiin an party dinna an lo titlu tawh tih a sawi a ni.