District tih mawi dan tur duang tha berah Khawzawl thlan a ni

District tih mawi dan tur duang
tha berah Khawzawl thlan a ni
Urban Development & Poverty Alleviation department chuan district headquarters tinte tih mawi dan tur duang turin district tin a ti a, hemi ang hian ruahmanna siam zui tum a ni. A chei mawi dan tur duang tha berah Khawzawl district thlan an ni.
District Beautification Competition result puan leh lawmman sem hi March 21 khan neiin, hmanpuitu UD&PA minister K Sapdanga chuan he inelna danglamna chu, inelna dangah chuan result puan chu a hmawrbawkna a nih thin laiin, tuna an inelna result puan chu a bul tanna chauh a ni, tiin a sawi.
Lawmman dawngtuten an lawmman dawn chu an detail project report-in a tak ram a chantir theihnan bultannan hmang a, tuna lawmman dawng ve lote pawhin a lehpek atan tha thlah loa ‘inelna spirit’ kalpui chhunzawm zel turin a chah. Inel chhunga district tin inpekna leh thawhrimna fakawm a tih thu minister hian sawiin, he inelna hian district tinah ngaihtuahna thar leh hmasawnna rahbi thar a kaipui ngei an beisei tih a sawi bawk.
District cheimawi tum dan ruahmana inelnaa titha zual pathum chu: 1-na Khawzawl district, 2-na Siaha district, 3-na Serchhip district an ni. District titha zual pathum lawmman hian cheng nuai 50 a kengtel a, participatory prize hian cheng nuai 2 a kengtel.
UD&PA director Jacob Lalawmpuia chuan District Beautification Competition 2025 chu UP&PA minister leh secretary-te thahnmengaihna in state priority project hnuaiah district lama official-ten an district headquarters cheimawina atan leh khawpui thang zela an district theuha hmasawnna daihrei an neih theihna atana duan a ni tih a sawi. Inelna hi 2024 December 17 khan khuhhawn a ni a, district tin hian an khawpui cheimawina tur leh thuamthatna tur hrang hrang atan DPR an buatsaih theuh a, inbuatsaihna hun atan 2024 December 17 atanga 2025 February 26 thleng hun pek an ni. February 27-ah DPR thehlutin, February 28-ah district tinin project presentation an pe a. He inelna hi Mizoram University-a Department of Planning & Architecture atanga mithiamten endikin, March 3 atanga endik (on-field assessment) tanin, March 12-ah an zofel a ni.
District-tel te lawmman bakah judge-te chetvelna atana senso ngai, lawmman leh programme hrang hrang huaihawtna atan bakah senso tul dang nen, a vaiin District Beautification inelna budget hi Rs.1,70,93,000 dah a ni.