Mizoramah ASF inlar leh ta

Hun engemaw chen a reh hnuah African swine Fever (ASF) a inlar leh a, Mizoram hmun thenkhat a tibuai mek. ASF vanga vawk thi ni 80 chuang a awm loh hnuah tun hnaiah ASF vangin vawk a thi leh a, Mamit district leh Lawngtlai district-ah ASF hi finfiah a ni.
AH&Vety department atanga thu dawn danin, tun hnaiah Mizoramah ASF vangin vawk 227 a thi a, vawk 48 tihhlum/suat a ni bawk.
Lawngtlai district-a Bungtlang South-ah vawk 100 chuang fe a thi a, Lawngtlai-ah 20 chuang a thi. Mamit district-a Zawlnuam khuaah Bawrai-ah 16 a thi a, Vengpui-ah pakhat a thi.
Tun hnaia vawk thi hi AH&Vety department hian ASF vang a ni tih an finfiah a, mahse India sorkar thu angin vawk thihna hmun leh a chhehvel km 1 bial chhunga mi chu NERDDL (North Eastern Regional Disease Diagnostic Laboratory (NERDDL), Guwhati-ah endik turin a sample thawn niin, anni hian an lo finfiah ve leh a ni. NERDDL atang hian March ni 20-ah report an dawng a, March ni 21 report-ah AH&Vety department hian an telh nghal. March ni. An report-a a lan danin, March ni 21-ah vawk 222 a thi a, vawk 33 tihhlum a ni. March ni 22-ah vawk panga a thi a, tihhlum a awm lo. March ni 23-ah vawk thi a awm lo a, vawk 15 tihhlum a ni.
AH&Vety department hotute chuan ASF darh dan hi hriat theih a ni rih lo tih an sawi a, tuna an finfiahna bul velah a darh tawh em tih te, hmun dangah hri hi a leng em tih te hriat a ni rih lo tih an sawi. Hmun dang atangin rinhlelhawm report an la dawng lo tih an sawi bawk.
Tuna he hri a lo lang leh hi thil mak a ni lo tih an sawi a, ASF hian Mizoram min chen chilh tawh avangin engtik emawa rawn lang leh tura ngaih sa a nih thu te an sawi.
Nikum khan ASF hian Mizoram a tibuai a, finfiah hmasak ber chu February ni 9-a mi niin, ASF vanga vawk thi hnuhnung ber chu December ni 23-a mi a ni. 2024 December ni 24 atangin ASF vanga vawk thi a awm ta lo char char a, ni 80 chuang Mizoram a him hnuah tun hnaiah hri hi finfiah a ni leh ta a ni.