Ditwah vanga Sri Lanka-a Indian tangkhang 400 hruai haw

Ditwah vanga Sri Lanka-a Indian tangkhang 400 hruai haw
Cyclone Ditwah avanga thlawhna thlawk mumal thei lo vanga Sri Lanka khawpui, Colombo-a Bandaranaike International Airport-a Indian tangkhang 400 vel chu Pathianni khan Indian Air Force (IAF)-in phur haw bik tur tirin an hruai haw.
Sri Lankan thuneitute chuan mi 150 chu Delhi-ah C-130 thlawhna hmanga phurh haw niin mi dang 250 chu IL-76 hmangin Thiruvananthapuram panpui an ni tih an sawi a. IAF thlawhnate hi Inrinnia Colombo thleng niin tui lian tuar mekte hnena pek tur ei tur leh mamawh dang a phurh nghal a ni.
Sri Lanka-ah hian ruah tam tak sur vangin tui lian leh lei min a nasa hle a, ram chhung hmun hrang hrangah inkalpawhna leh thil dang a buai phah a. Indian high commissioner nihna chelh lailawktu, Dr Satyanjal Pandey-a chuan Inrinni khan tumhmuna tangkhangte hi a tlawh nghe nghe.
High commission chuan tui leh ei tur semin New Delhi atangin la chhuak tura hmalakna kalpui mek a ni tih a hrilh.
Pathianni chawhma lam khan Indian mission chuan, “Sri Lanka-a Indian tangte chu lak chhuah hna thawh a ni dawn a. Vawiin hian IAF leh sumdawng thlawhna hmanga lak chhuah tum an ni a, Indian tang zawng zawngte hi a hma thei ang berah an in thlen tum an ni,” tiin X-ah an tar lang.
High commission hian rikruma biakpawhna tur phone number pawh a tichhuak bawk.
Sri Lanka-ah hian cyclone thawk na tak avangin en puang mek a, hmun tam tak chhiatna thlengin tui a lian a, lei a min nasa a, inkalpawhna chhiain thlawhna pawh a thlawk hlei thei lo.
An ram disaster management centre chuan Pathianni khan Ningani atangin thi mi 212 vel awm tawhin chin hriat loh mi 218 an awm tawh niin an sawi.