Australian Open 2023 khelh zawh takah mipa lama champion Novak Djokovic kha hliam tuar chungin a inlan a. Hliam nei chunga a chak zel bakah, a champion tak hial vangin Djokovic hian rinhlelhna nasa tak a tawk a, ‘a na der’ tia puhtu tam tak an awm. Mi lainat hlawh duh vanga na der ang hiala puh a nih lai hian Australian Open tournament director Craig Tile chuan Djokovic hi an inhliam ngei thu Nilaini khan a puangzar ta thung.
-- Advertisement --
Tournament director Craig Tile tarlan danin Djokovic hian hian hliam a tuar ngei a, a mal tha (Hamstring) kha 3cm (1.2 inches) a thui a lo thler reng. Craig Tile-a’n fiahna a tarlan hian Djokovic puh chhetute ka a hup ngei tura ngaih a ni a. Djokovic hliam chungchangah zawhna tam tak neite pawhin chhanna fumfe, chhanna rintlak an hmu ve ta bawk.
Australian Open ah vawi 9 zet champion tawh Djokovic hi Australian Open 2023 khelh tan hma lawk khan Nick Kyrgios nen exhibition match an khel a. Australian Kyrgios nen an inkhel hian ngaihhlut a hlawh viau a, khelmual khat tlatin mipui an pungkhawm. He mi tum hian player pahnihte hian hliam nei ve ve in, tualchhung tlangval Nick Kyrgios hian inelna a hmachhawn thei lo. Djokovic hian Kyrgios a hmachhawn hnuin practice a nei mumal thei lova, Australian Open a hmachhawn thei dawn em tih a chiang lo zui viau. Australian Open 2022 ah a tel ve theih loh vangin 2023 ah chuan Serb hian tel ngei a tumruh viau a, dam chiang lo chungin a inlan zui ta a ni.
Australian Open 2023 tir lamah Djokovic hi a khel tha nghal mai lova, khingpui nem zawk lakah hliam tuar chungin a chak hram hram. Inelna a rei a, a hliam a dam ve zel a, khel tha tulh tulhin, a vawi 10 nan a champion zui ta hial a ni. Melbourne Park-ah a vawi 10 nan champion turin Djokovic hian hun khirh leh harsa tak a paltlang. A coach Goran Ivanisevic chuan Djokovic a hliam tawrh ang hi player dangin tuar ve ta sa 97% chu an inhnuhdawh a rin thu a sawi. Hei hian Novak Djokovic tumruh zia leh paukhauh zia a tilang chiang viau a. Craig Tile-a’n a hliam tawrh dan kimchang a puanzarsak leh bawk nen ringhlel chunga an sawisel Djokovic hi fak zui mai loh chu tih tur dang a tam lo ta viau a ni.