Djokovic a tla ringawt
Indian Wells khelh mekah World No. 1 Novak Djokovic chu kum 20 mi Luca Nardi hneh lovin a tla a, third round a paltlang zo lo. Djokovic a tlak lai hian Daniil Medvedev leh Holger Rune te an chak ve thung.
Djokovic hi vawi nga a champion tawhna Indian Wells-ah hian kum nga ngawt a inlan thei lo tawh a. Kum nga zet hnuah inlan ve leh bawk mah se beisei a phak lova, third round paltlang zo lovin a tla ri ngawt. A hneh loh ber kher hi qualifying pawh pal tlang zo lova, midang inhnukdawk an awm vanga inelna hmachhawn leh thei mai mai a ni leh ta nghal a, a muaphona a zualkai.
Champion tura rinkai Djokovic lakah kum 20 mi Luca Nardi hian rin phak bakin bul a tan tha a, set khatnaah break pawimawh taka nei a, rin loh takin set a la hmasa. Set hnihnaah Djokovic a insiamtha a, game thum chauh hloh chungin set a la let. Set khat ve ve an lak hnuin Djokovic tan chakna chance a tha lehzual viau a ngaih a ni a, mah se rin angin thil a kal lo. Deciding set-ah Nardi a khel tha chhunzawm a, hma taka break a neih chhawr tangkaiin set a la leh ta mai a. Tennis player ropui ber Novak Djokovic lakah 6-4, 3-6, 6-3 a hnehna changin fourth round a inhlangkai.
Tarlan tawh angin Djokovic hnehtu Luca Nardi hi Indian Wells hmachhawn tur zawnnaah a chak lova, inelna a hmachhawn phak mai lo. Inelna hmachhawn tur inhnukdawn an awm vangin inelna hmachhawn turin koh a ni a. Novak Djokovic hial hnehin fourth round a lut ta hial a ni.
World No. 123-na Nardi laka mualpho Djokovic hian kum bul a tan tha lova, kum 2024 ah champion na a la nei lo. A ropuina hmun Australian Open-ah Jannik Sinner hneh lovin final a lut zo lo va, vawi nga a champion tawhna Indian Wells-ah third round a paltlang zo lo leh bawk. Nardi laka a tlawm hnuin Djokovic chuan, “inelnaah chuan chak chang a awm a, tlawm chang a awm bawk a, hei hi infiamna peng pakhat a ni. Kum bul tan tha lo mah ila ka hnual lova, hma lam panin ka thochhuak thuai dawn tih ka ringhlel hauh lo”, a ti.
Djokovic a tlawm lai hian Daniil Medvedev chuan Sebastian Korda a hneh a, Holger Rune, Casper Ruud leh Taylor Fritz ten last 16 an lut ve bawk.