Djokovic a tlang, Ruud leh Tsitsipas an tla

US Open 2023 khelh mekah nilai zan khan champion tura rinkai Novak Djokovic chuan awlsam taka hnehna changin, third round a lut. Awlsam taka Djokovic a tlang lai hian mipa lama player langsar zinga mi Stefanos Tsitsipas leh Casper Ruud te chu lehthalin an awm a, second round paltlang zo lovin an tla ve thung.
US Open zawh ruala World No. 1 thar tur Novak Djokovic hian second roundah Bernabe Zapata Miralles a hmachhawn a. Set khatnaah inkhel hautak pangngai tak hmachhawn bawk mah se, set a lak hnuin a chetha zui ta viau thung a. Set hnuhnung pahnihah game hnih chiah a hloh.
Zapata Miralles hian set khatnaah Grand Slam-a vawi 23 champion tawh Novak Djokovic a khel thei viau a, inkhel hmuhnawm a phochhuak thei. Inhnehtawk taka an inkhelh laiin a serve tum khat a hum zo lo zeuh a, hei hi a hnufualpui a, set hmasa a hloh phah ta a ni. Set hnihna leh set thumnaah Djokovic a chungnung ta viau thung a, break a nei ta zawt zawt. Set hnihna leh set thumnaah hian game khat ve ve chiah hlohin Serb hian set a la zawn a. 6-4, 6-1, 6-1 a hnehna changin third round a lut a, last 16-ah a hnam pui Laslo Djere a hmachhawn zui leh ang.
World No. 1 thar ni turin Djokovic hian US Open-ah vawi khat chak chiah a mamawh a, vawi hnih a chak zawn tak vangin No. 2 Carlos Alcaraz nen an inkar a zau zual zel a. Champion lai Alcaraz hi a champion nawn leh thei lo a nih a, Djokovic a thlensan bawk si chuan No. 1 leh No. 2 te inkar hi a zau thui thei viau dawn.
Awlsam taka Djokovic a tlang lai hian mipa lama ngaihven hlawh phak dang Casper Ruud leh Stefanos Tsitsipas te erawh chu second round paltlang zo lovin an tla ve thung. Kum liam ta maiah final thleng hial Casper Ruud hian Chinese world number 67 Zhang Zhizhen a hmachhawn a. Inkhel hmuhnawm, set nga inkhelah duap zawkah a tang.
Ruud hian Zhang lakah bul a tan tha lova, set khatnaah a serve vawi khat a hum zawh loh vangin set a hloh. Set hnihnaah inhnehtawk taka inkhel zuiin, Ruud hian break pawimawh tak a nei ve thung a, set a la let. Set thumnaah Zhang a khel tha viau thung a, game hnih chauh hloh chungin set a la. Hnufual zawk a nih leh hnuin Ruud a er let na viau a, set linaah game khat lek pawh hloh lovin set a la a, deciding set khelh a ngai. Diciding set-ah rin loh takin Ruud a talbuai leh ta tlat thung a, game hnih bak a la thei lo. Inkhel hautak takah Chinese Zhang chuan inlehthalna lian a thlentir a, fifth seed Casper Ruud lakah 6-4, 5-7, 6-2, 0-6, 6-2 a hnehna changin, third round a inhlangkai ta a ni.
Ruud a tlak rual hian Seventh seed Tsitsipas pawh Swiss qualifier Dominic Stricker hneh lovin a tla ringawt bawk.
Player langsar, Greek tlangval Tsitsipas lakah Dominic Stricker hian beisei phak bakin a khel tha a, break pawimawh tak a neih chhawr tangkaiin set la hmasa zawkah a tang. Set hnihnaah inkhel hmuhnawm tak an lantir chhunzawm a, tie-break khelh a ngai. Tie-break-ah Tsitsipas a chungnung zawk a, set a la let. Set thumnaah pawh tie-break khelh a ngai zui leh a, Greek tlangval a chungnung zui leh a, third round a hnaih hman kuarh.
Set hnihna leh set thumna tie-break hmanga chin fel a nih ve ve hnuin set lina pawh tie-break hmang bawkin chin fel a ngai zui leh a, Stricker a chungnung ve ta thung. Set hnih ve ve an lak hnuin deciding set-ah Dominic Stricker a khel tha ta viau a, hma taka break a neih a chhawr tangkai a player langsar lakah 7-5, 6-7(2), 6-7(5), 7-6(6), 6-3 in a chak a, third round a inhlangkai ta a ni.
Mipa lamah champion tura rinkai pathum; Holger Rune, Casper Ruud leh Stefanos Tsitsipas te an tla der tawh. Ruud leh Tsitsipas te tla hi Novak Djokovic kawng ti-awlsam lehzualtu an ni thei dawn a. Player langsar hmachhawn mumal nei lovin Djokovic hi final lut thei dinhmunah a din phah a ni.