Djokovic leh Ivanisevic an inthen

World No. 1 Novak Djokovic leh a coach Goran Ivanisevic-te an inthen a, an thawkdun tawh rih dawn lo.
Wimbledon champion hlui Ivanisevic hi tennis player ropui ber ang hiala ngaih Djokovic nen hian March 2022 atangin an thawkdun tan a, Djokovic-a main coach a nih lai hian kum 2018 atanga Djokovic lo kaihruai tawhtu Marian Vajda-te nen an thawkdun.
Serb Djokovic hi Grand Slam-ah vawi 24 a champion tawh a, mipa lamah champion ngun ber a ni mek.
Kum 2023-ah ropui taka inlanin, Grand Slam paliah final a lut vek a, Australian Open, French Open leh US Open-ah a champion a, ATP Finals-ah champion bawkin, ATP Finals-ah phei kha chuan Roger Federer-a record a khum a, champion ngun ber a ni.
Ropui takin kum 2023 hmang zo mah se 2024-ah bul a tan tha lo. A ropuina hmun Australian Open-ah final a lut zo lo a, semi-final lamah Jannik Sinner a hneh lo. A hneh loh Sinner hi a champion zui ta nghe nghe.
Australian Open final a luh zawh loh hnuin inelna hmachhawn zui loin a awl deuh vang vang a, a chawlhhamdam hnua inelna a hmachhawn hmasakber Indian Wells-ah World No. 123 Luka Nardi a hneh lo leh ringawt a, fourth round a lut zo lo.
Kum bul a tan chhiat em vang hian ngaihtuahna thar a nei a, a coach Goran Ivanesevic nen thawkdun tawh rih lo turin thutlukna an siam.
“Goran nen hian inkawp tawh rih lo turin ni reilote liamtaah khan thutlukna kan siam,” tiin Djokovic hian Instagram lamah an thutlukna a tarlang.
Djokovic nena inthen ta Croat Ivanisevic hi kum 2023 khan ATP Coach of the Year atan nominate a ni. May ni 26 hian French Open khelh tan a ni dawn a, Ivanesevic tel loin Djokovic hi a vawikhatna’n a inlan ang.