Doha khawpuia kir tum Neeraj Chopra

Doha khawpuia kir tum Neeraj Chopra
Double Olympic medallist Indian javelin thrower Neeraj Chopra chuan Thawhlehni khan tun season-a a kir hun tur tichiangin, thla thar May ni 16-a Doha Diamond League-a a inlan tur thu a nemnghet.
Chopra hian kum 2023 khan Qatar ramah hian 88.67m khawhin world champion a lo ni tawh a, Qatar Sports Club-a a hlawhtlin hma Tokyo 2020 Summer Olympics-ah khan gold awrh tawhin, 2024 Paris Games-ah silver medal a awrh leh a; nupui a neih hnua chawlhte a hman hnuah tun season atan Doha khawpuia Wanda Diamond League meeting-ah a kirleh dawn a, he intihsiakah hian a zawna kum thum a inlanna tur a ni.
Chopra chuan Qatar rama India mite thlawpna a hlawh thin thu sawiin, an laka a lawmzia chu tawngkama sawifiah zawh rual loh a nih thu a sawi.
Kum 27-a upa Neeraj hian coach atan Jan Zelezny of Czech Republic a ruai mek a, he Czech coach hi men’s world javelin record (98.48m) kawl mektu niin, Olympic leh world champion a ni tawh bawk.
Indian sporting icon Chopra hi Indian track and field athlete zinga Olympic gold leh World Championship gold la ve ve thei hmasaber a ni satliah mai lo a, Indian infiammi zinga Diamond League meeting leh Diamond League title la thei hmasaber a ni nghal bawk.
Season liamta khan a ropui lehzualna tur hun remchang bawhpelhin, Olympic final-ah Arshad Nadeem pha loin pahnihna a ni a; Brussels khawpuia Diamond League Final-ah Anderson Peters a hmakhalh zo lo bawk.
Chu mi chungchang chu Diamond League website-ah Chopra hian tarlangin, “Nikum kha a hautak khawp mai a, mahse, Olympic Games lawmman semna dawhsan ka chuankai tho avangin India tan ka thlen chin kha ka chhuang tho a; tunah hian ka fit leh tawh a, Jan Zelezny nen rim takin kan thawkdun a, Doha khawpuiah hian ka season bul tan ka tum a ni,” a ti.
Chopra inlanna tur Wanda Diamond League hi khawvel huap athletics inelna lian nikhat awh niin, khawvel puma track and field intihsiakna ngaihhlut ber ber 15 hmanga intihsiakna a ni.
14 series meetings kaltlangin athlete-te chuan point khawl an tum dawn a, an point hmuh hmang chuan Zurich khawpuia August 27-28, 2025 chhunga nghah tur two-day Wanda Diamond League Final-a inlan phak (qualify) an tum dawn a ni.
Doha meet zawhah hian Chopra chuan May ni 24 hian Panchkula hmuna ‘Neeraj Chopra Classic’ javelin event-ah inelna a hmachhawn zui leh ang.