Donald Trump-an attorney hlui Michael Cohen khing zui

US President hlui Donald Trump chuan a lawyer hlui chu inremna bawhchhiat tiin $500 million chawi turin a khing zui.
Michael Cohen chuan attorney a nih anga a mawhphurhna a bawhchhia tiin a sawi.
Cohen hi New York-a Trump laka chhuichianna kalpui mekah thuhretu pawimawh ber niin Trump lamhnai te chuan Cohen hi na taka an beihzui mek a ni.
Cohen thupuangtu leh lawyer Lanny Davis chuan a client laka lawsuit kalpui chu a hlawhchham a beisei thu a sawi a.
He legal action Florida federal court a filed-ah hian Cohen chu ‘a client hlui leh chhung leh khatte laka mawi lo taka sawi nei leh chet la’ ah puh a ni a.
Cohen hi kum sawm tam Trump attorney-a tang niin Trump Organization-ah pawh vice-president nihial hman niin Trump a fixer tia hriat lar a ni bawk.
Mahse kum 2016 election hnuah an pahnih inkar chhiain investigator tena Trump thuihruai hnaite an chhui chian hnuah an inkar a chhe zui takzet nghal a.
Kum 2018 khan Cohen chu Trump campaign finance bawhchhia leh inbumna kalpui tia puh niin thiam loh chantir a nih hnuah kum thum lung in tantir a ni a.
Tunah chuan lung in atanga chhuak tawhin Cohen chu Trump sawiseltu langsar ber a ni zui ta a, news programme hrang hrangah a inlar zut reng tawh a ni.
Cohen hian lehkhabu ziakin podcast a host bawk a, chung pahnih te chu Trump chuan lawsuit a thehluhah a tarlang nghe nghe a.
Cohen chuan dik lo takin kum 2020 a lehkhabu tihchhuah Disloyal ah chuan Trump chu ‘racist’ a ti tiin Trump lawsuit chuan a tarlang bawk.
Cohen lawyer Davies chuan, “Trump hian a ngaite bawkin judicial system chu Michael Cohen nghaisak leh vau nan a hmang leh ta” tiin a sawi a. “Hlauhthawn a nei tih a chiang a, a tum ber nia lang chu amah laka chetla thei prosecutor-te thawhpuite vau zam a ni,” tiin a sawi bawk.
New York prosecutor te chuan Trump chu business record dik lo siam tiin felony count 34 an siamsak a, hengte hi porn star Stormy Daniels hnena ka hup nana sum a pek kaihhnawih tiin an sawi.
April 4 khan Trump chu Manhattan criminal court-ah inlanin US president ni tawh zinga criminal charge nei hmasa ber a ni zui bawk a.
Cohen hian Trump fixer a nih laiin Daniels hnenah ka hupna sum $ 130,000 a pek thu a sawi thung a. Hei mai bakah hian Cohen chuan Trump chu ‘Tuangchhah tak tak lo’ tia sawiin, “A tuang a chhah lo viau zawk a, ego dawrawm tak a nei zawk,” tiin a sawi.