Dragonfruit hralhnaah harsatna

Tunlai hi Dragon fruit thar hun lai a ni a, market a awm mumal loh avangin Dragon fruit chingtuten harsatna an tawk. A bikin Kolasib district-a Dragon fruit chingtuten an tharchhuah hralhnaah harsatna an tawk nasa nia sawi a ni.
Thudawn danin, Mizoram Dragon Fruit Association Kolasib District hruaitute chuan Nilaini khan Kolasib DHO Lalnunpuia hmuin an harsatnaa hma lakpui turin an ngen a. DHO hian Dragon fruit-ah Horticulture department-in nasa thu lo hrilhin, sawrkarin ‘One Village One Crop’ a kalpui angin Kolasib district chu Dragon fruit tan a ruahman a; farmer-ten a hralhnaah harsatna an tawk a nih chuan thuneitu sang zawkah awmze neia a thlenpui theih nan harsatna tawh dan kimchang ziaka thehlut turin a lo rawn a ni.
Kolasib district hi Mizorama Dragon fruit chin tamna hmasa niin, chhungkaw tam takin ching mah se, tih tak taka hma la chu chhungkaw 80 vel an ni. Heng mite hian an thar mek bakah la thar ve lo, bul tan mek pawh chhungkaw engemawzat an awm. Nikum khan Dragon fruit quintal 800 vel tharin, kuminah quintal 1000 vel thar an inbeisei a ni.
Kolasib district-ah hian Kolasib Agro Marketing Cooperative Society (KAMCO) chuan kumin atangin Dragon fruit processing bul an tan a. An hruaitute sawi danin, June khan quintal 30 vel Dragon fruit an leikhawm a, an lei sen loh tam tak la awm chu a chingtuten a hralhna mai tur an hriat loh avangin kuthnathawktu engemawzat chuan an manganpui tih an sawi. An processing house-a dahkhawmna tanky a tet deuh avangin thla thum vel chu Dragon fruit lei an chawlh rih a ngai dawn tih KAMCO hruaitute hian an sawi a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More