Dragonfruit lei turin MoU ziak

Lungleia dragonfruit chingtuten an thlai thar chhuah man bithliah (rate) felfai leh man man zawka an hralh theihnan District Horticulture Office Lungleiah Mizoram Dragonfruit Farmers’ Association (MIDFA), Sub. Hqrs Lunglei leh Tawitlang Farmers Producers Company chuan kumina dragonfruit thar chhuah, lei leh hralh chungchanga inremna (memorandum of understanding) an ziak.
MoU ah hian Lunglei district-a thar dragonfruit tha chu MIDFA Sub-Hqrs Lunglei hnen atangin Tawitlang Farmers Producers Company hian kg. khat Rs 130in an leisak dawn a. Inremna an siam hian 2025 November 30 thleng a huam ang.
Dragonfruit lei tur hi a grade then a ni dawn loa; a pum hmin tha leh him chauh lei a ni thung ang. Dragonfruit thar chhuah lakkhawm, thliar fel, buk leh hralhna hmun atan Mualthuam ‘N’, Pukpui leh DHO Office Lungleiah collection centre dah tum a ni bawk.