Duh angin Aizawl a chei theih tawh loh – Deputy CM

Aizawl khawpui chu a leilung tawt leh hmun chep lutuk tawh avangin duh anga chei leh hmasawnna kalpui hleihtheih a ni thin lo tih deputy chief minister Tawnluia chuan a sawi.
UD&PA department bultuma din tum, Tuikual North-a Multi Utility cum Convention Centre lungphum chu UD&PA changtu deputy chief minister hian Zirtawpni khan a phum a. Aizawlah infrastructure lama development hrang hrang chu duhthusam ni mah se, a ram leilung khat lutuk leh hmun chep ta lutuk avangin duh angin hmasawnna kalpui a ni thei thin lo tih a sawi a. Heti chung hian, hmun awl tuaihnum tur a awm a nih chuan sawrkar chuan hma a lak thuai zel a beisei tih a sawi.
Multi Utility Centre sak a nih theihna’n bul tantu pawimawh chu Lok Sabha MP C Lalrosanga leh Planning changtu chief minister an ni tih sawiin, UD&PA chu kum 2006 atang chauha department ding tan ni mah se, Aizawl khawpui cheimawi leh tuaihnum na’n nasa takin hma a la tawh a; tun dinhmunah Smart City kaltlanga project liantham tak tak kalpuiin lungphum phum zel a ni tih a sawi. Aizawlin urban development kawnga hma a laknaah khawpui chhung lirthei veivak tawt ta lutuk sutkianna tura parking space siam chu a ngaipawimawh hle tih sawiin, Multi Utility Convention Centre-a parking space a awm tur pawh chu lawmawm a tih thu a sawi a ni.
A satu tur contractor-te chu felfai taka Advisory Board-in a thlan an nih anga hna thawk turin Tawnluia hian a hrilh a, vengchhung hruaitute leh kalkhawmte hnenah Multi Utility Centre chu sak zawh a nih hnu ah pawh duat taka enkawl zui turin a ngen.
Bialtu MLA, minister Lalruatkima chuan Multi Utility Convention Centre chu multi purpose a nih angin, Tuikual North-in a mamawh tak futsal ground, market shed, parking, restaurant leh conference hall awm tura duan a ni tih a sawi. He project bakah hian storm drainage, JL thlang atanga Ebenezer thleng kal thei tura ruahman pawh bawhzui mek a ni tih a sawi bawk.
Multi Utility cum Convention Centre project hi NEC atanga hmuh niin, Planning & Programme Implementation chu nodal department a ni a, UD&PA chu implementing agency a ni. Sum ruahman hi cheng nuai 299.91 a ni.