Champhai district-a African Swine Fever thawh thumna leng mekah thla hnih tling lo deuhah vawk 86 a thi tawh a, an suat te nen chuan 268 an thi tawh.
Champhai District Level Committee on African Swine Fever & other Transboundary Animal Diseases chu Zirtawpni khan an chairman, bawrhsap James Lalrinchhana hoin an thukhawm a. ASF chungchanga district dinhmun, a darh zel loh na’na hmalak tul leh vawk thi sawngbawl kawnga hmalak tulte ngaihtuah ho a ni.
Bawrhsap chuan African Swine Fever avangin Champhai district-ah nikumah vawk engemawzat an thih thu leh hemi avang hian cheng vaibelchhe 65 dawn hloh anga chhinchhiah a nih thu a sawi a. Kumina ASF leng thar leh chu ngaihthah loa theihtawp chhuaha khuahkhirh tuma hma lak tlan a tul tih a sawi a ni. Vawk hrileng khuahkhirh nana thuchhuah siam zawm loa, dan loa vawk tawlhruk ven kawngah tan lak tlan a ngai tih a sawi bawk.
District AH&Vety office report danin, ASF hrileng thawhkhatna chu 2021 May 9 khan Zokhawtharah hmuhchhuah niin, khua/veng 11 ah a darh a, vawk 549-in an thihpui. ASF thawhhnihna chu 2022 February 4 khan Champhai Electric Veng atanga intan niin, khua/veng 41 a nghawng a, vawk thi leh suat 8454 a tling.
ASF thawhthumna hi kumin April 29 khan Ngur khuaah report a ni a, veng/ khua pathum – Ngur, Zote leh Champhai Vengsang chu vawk hri lenna hmun ‘infected area’ a puan a ni tawh. ASF leng thar leh mek avang hian June 22 thleng khan Ngur, Zote leh Champhai Vengsangah vawk thi 86 leh fimkhur thua suat 182 awmin, vawk thi leh suat tawh hi 268 a ni. Champhai district-ah vawk 6000 chuang an awm mek nia chhinchhiah a ni.
Thutkhawmah hian vawk thi sawngbawl leh phumbo zel dan turte ngaihtuah a ni a. Khawpui huamchhunga vawk thi, phumna neilo tan Sub-Hqrs. YMA Champhai-in khawtlang mamawhna hriaa phal taka Keifangtlang, Hmunhmeltha road kawngthlang ami ram hman hawh an phal, nikum lama hman tawh chu a tul anga ruahman leh nise tih a ni.
Thla hnih chhungin vawk thi leh suat 268 tling tawh
Get real time updates directly on you device, subscribe now.