Duh khawp lohna tam tak awm mahse mi inzir mi a ni – Minister Lalthansanga

Duh khawp lohna tam tak
awm mahse mi inzir mi a ni
– Minister Lalthansanga
Dampa bial by election neih turah an party official candidate chu duh khawp lohna tam tak awm mah se, mi inzir mi tak a ni tih ZPM hruaitu Lalthansanga chuan a sawi.
Ningania West Lungdar-a Mizoram People Forum buatsaih vantlang inkhawmah minister Lalthansanga chuan, ZPM chu tawngtainaa din a ni a, ram rorelnaah Pathian ram thlen tir chu an tum ber a nih angin, tun thlengin an hotute, a bikin ZPM minister zingah eiruknaa hminghliau an la awm lo tih a sawi.
Hun rei tak sawrkarna lo chelh tawhten an hun laia an tih theih loh chu kum hnih pawh a ral hmain ti turin an beisei a, an beiseina a sang hle tih hriatin a lawmawm hle zawk tih a sawi a. Department hrang hrang hmasawnna ngun taka thlirin, kum hnih pawh la tling lo sawrkarin ram a hmangaih zia a langchiang hle tih a sawi a ni.
Mamit district chu aspirational district-a thlan a nih avangin, hemi denchhen hian Dampa bialah pawh hmasawnna hna thawh tur thawh mek leh hmachhawp engemawzat a awm, tiin, chak taka thawh a nih theihnan ZPM candidate thlangtling turin a ngen tih a sawi.
ZPM MLA-te chu la naupang leh tawnhriat la nei lo tak an ni tih sawiin Lalthansanga chuan, “2023 inthlan dawn khan kan candidate-te a mimal takin beih an tawk nasa hle. Pu Jeje Lalpekhlua pawh House-ah ball a pet dawn ami, tih thlengin an bei a. Chutiang bawkin Pu Vanlalsailova pawh tunah mimal takin beih a tawk nasa hle a, duhkhawp lohna tam tak a awm pawh a ni thei, mahse mi inzir mi tak a ni a, Pathian pawhin amah a awmpui zia leh mal a sawm zia Zoram mipuiin kan hria a ni,” a ti.