Duhoma insawifiahna in rinhlelh nemnghet – MPYCC

Guwahati-a BJP aiawhte nen an inbiak loh thu ZPM leader-in a sawifiahna chuan a rukin BJP leh ZPM thawh ho tumin an inbe thin tih a nemnghet tih Congress Thalai chuan an sawi.
Congress Thalai Hqrs. thuchhuak chuan, kumin June 27-a Guwahati-a ZPM leader kal, a tuk June 28-a a rawn haw leh chungchangah thil rinhlelh awm tak a awm nia a hriat thu leh, July 17-a ZPM office-a Pu Lalduhoma insawifiahna chuan a rukin ZPM leh BJP thawhho tumin an inbe thin ngei tih a nemnghetah a ngai tih a sawi.
‘MLA candidate atana mi hausa leh langsar lawrkhawmtu ZPM party chuan sum chakna leh BJP chakna hmanga sawrkar hram hram dan an zawng ngei niin a langchiang tawlh tawlh a. Chutiang atan chuan hnam tlem zawk leh Kristian sakhaw chimral tuma hma la mek BJP chakna leh sum rin tumin an dawr ngei tih ZPM leader Pu Lalduhoma thusawi hian a nemnghet,’ a ti.
An chakna chhawr tuma tum tam tak BJP lo dawr tawh nia Pu Lalduhoma hi sawiin, BJP nen inthlunzawm a duhna audio a awm bakah kum 2014 khan MNF nen NEDA an zawmna lehkha amah Pu Lalduhoma leh Pu Zoramthanga te hming sign ngei a kawl that thu MNF president Pu Zoramthanga’n a lo sawi tawh tih Congress Thalai hian an sawi a. ‘Pu Lalduhoma hi Mizorama BJP-in bu a rawn khuar theihna’na ruahmanna siampuitu a ni a. 2018 inthlanpui atan mai niloin, hun lokal tura BJP-in kan rama rahbi a rawn siam theih nana hmanruaa BJP-in an hman nih hi a duh dan a ni,’ thuchhuah chuan a ti.