Dutch Eredivisie champion Feyenoord

Dutch Eredivisie champion Feyenoord
Pathianni zana Dutch Eredivisie khelhah hmahruai mektu Feyenoord Roterdam chuan De Kuip a an mikhual Go Ahead Eagles chu si thum faiin an hneh a, Dutch Eredivisie-ah a vawi 16 nan an champion.
Dutch Eredivisie table-ah a chung ber luaha PSV Eindhoven lakah point 5 a hmahruai fal mek Feyenoord hian an mikhual Go Ahead Eagles hneha champion chian nghal ngei tumin thapui an thawh a. An mualah an khel tha viau nghe nghe. Inkhel tan atanga minute 15-na lekah Oussama Idrissi chuan hmahruaina goal a thun a. Goal hmahruai an thun atanga minute thum hnu lekah Santiago Giménez chuan an goal hnihna a thun zui leh a, si hnih faia hmahruai chungin chawlhlawk an hmang.
Chawlhlawk hnu lamah hmahruaitu an khel tha chhunzawm zel a, minute 54-naah Igor Paixão chuan an goal thumna thunin an hmahruaina a tizau. Hun tawp thlengin goal dang a luh belh tawh lova, khelh hmabak khelh hnih la nei chungin Feyenoord Roterdam chu Dutch Eredivisie 2022-23-ah an champion chiang ta a ni.
Dutch Eredivisie 2022-23 ah hian khelh hmabak khelh hnih la awmah Feyenoord hian point 79 an hmu mek a, an hnuai chiaha awm PSV lakah point riat ngawta an san tawh vangin lehpelh theih an ni tawh lo a. Champion lai Ajax kut atangin trophy an chhuhsak chiang ta a ni.