E. Bengal an chak awlsam

On Feb 18, 2026 1 0

Dinhmun chiang lo taka a awm reng hnuin India ramah football club te inelna san ber Indian Super League (ISL) 2026-27 season chu Pathianni zan atang khan khelh tan a ni ta nge nge. Pathianni zanah Jamshedpur FC leh Bengaluru FC ten hnehna an chang a. Thawhtan zan khan Kolkata club lian East Bengal in an mualah awlsam takin hnehna an chang ve bawk.
ISL 2026-27 a inkhel hmasa berah Jamshedpur FC chuan an mikhual Mohamedan SC chu 1-0 in an hneh. Jamshedpur hian I League champion Mohamedan SC lakah bul an tan tha viau a, Madih Talal chuan minute 9-na lekah hmahruaina goal a thun nghal. Hma taka goal an thun hi hun tawp thlengin an venghim a, an mualah hnehna nen bul tanin, point thum an hmu nghal.
Pathianni zana inkhel dangah team lian leh champion tura rinkai zinga mi Bengaluru FC chuan an mikhual Sporting Club Delhi chu 2-0 in an hneh. Champion hlui Bengaluru FC in an mualah khel tha mah se goal erawh an thun hma thei bik lo. Hun rei tak chhung goal lut a awm theih loh hnuin Sivasakthi Narayanan chuan minute 45’+1-naah hmahruaina goal a thun ta nge nge a. He goal hmang hian hmahruai zawk ni chungin chawlhlawk an hmang.
Chawlhlawk hnu lamah Bengaluru FC an khel tha chhunzawm a, goal khat an thun belh leh. Hun rei tak chhnung goal lut a awm belh theih loh hnuin Bengaluru in a tawp an khar tha. Player langsar Sunil Chhetri chuan minute 90’+2-ah an goal hnihna a thun a, an chakna a nemnghet zui ta a ni.
E. Bengal an chak awlsam
Thawhtan zan khan ISL khelh chhunzawm a ni a, team lian East Bengal chuan an mikhual North East United chu 3-0 in an hneh a, tha taka bul tanin, point thum an hmu nghal.
East Bengal hian an mualah khel tha thawkhat viau mah se goal erawh an thun har viau thung. Hun rei tak chhung goal lut a awm theih loh hnuin Youssef Ezzejjari chuan minute 65-naah hmahruaina goal a thun ta nge nge. AN mutan kheng thla a, goal an thun hnuin E Bengal an khel tha chhunzawm a, goal an thun belh leh thuai. Goal hmahruai thuntu Youssef Ezzejjari chuan hmahruaina goal a thun atanga minute nga hnu lekah an goal hnihna a thun belh zui leh zat a, an hmahruaina a tizau.
Goal hniha hmahruai fal tawh E Bengal tan hian Miguel Ferreira Damasceno chuan hun pek belh minute 90’+2-naah an goal thumna thunin, an chakna a nemnghet. Damsceno goal thun hnuin goal dang a luh belh thei tawh lova Kolkata team lian in an mualah awlsam takin point tn hmu. 3-0 a North East United FC hnehtu East Bengal hiian table chung ber an luah zi nghal.