ED-in auto dealer thenkhat dap

ED-in auto dealer thenkhat dap
Sawrkar laipui hnuaia awm Enforcement Directorate (ED) chuan February 11 khan Aizawla auto dealer thenkhat office an dap thut.
Thudawn danin, kum kalta lama Mahindra & Mahindra Financial Services Ltd. hminga car loan pek thu a cheng nuai 15000 chuanga inbumna awm chungchanga inhnamhnawiha ngaih car dealer thenkhat chu ED hian Aizawla an office an dap a, document endikin office pali vel an dap nia sawi a ni.
ED hotute hi Aizawlah Central Reserve Police Force camp lamah an inkulh a, state sawrkar/ state Police department lam pawhin an rawn kal tur thu hi a hma in an hre lawk lo nia thu dawn a ni. Tunah pawh an la cham nia sawi a ni bawk.
MZP Gen. Hqrs. chuan hemi chungchangah hian thuchhuah siamin, inhriattir lawkna leh Mizoram chhung thuneitute hriatpuina tello in Enforcement Directorate (ED) in Mizo sumdawngte an raid ngawt chu a ngai thutak hle tih a sawi.
‘Mizoram State Police hriatpuina tel miahloa hetia ED an rawn che hi Mizote min hmuhsitnaah kan ngai a, theih ang angin kan enzui zel dawn. Mizoram sawrkar thuneitute phalna la loa hetianga an chet chhunzawm zel hi MZP chuan a remti dawn lo,’ a ti.
ED-in Mizorama sumdawngte laka an hma rawn lak danah hian Mahindra Finance buaina kal zel chhuina ni siin, a thil tisualtu ber man tumna tak tak awmlo niin MZP chuan a ngai tih a sawi a. A tisualtu tak man chhuah tum ngei tur leh sumdawng dangte tibuai reng lo turin MZP chuan a hriattir a, Mizo sumdawngte pawh fimkhur zual turin a ngen tih a sawi a ni.