ED ten TN minister ching phar; eptu lam sa hle

Enforcement Directorate te chuan Tamil Nadu Electricity Minister V. Senthilbalaji chu money-laundering case-ah manin minister hi a chenna inah darkar 18 chuang thu zawhfiah a ni.
Thu zawhfiahna neih hnu hian Senthilbalaji hi car hmangin June 14 zing lam dar 2 ah Government Multi Super Specialty Hospital, Omandurar Estate, Chennai-ah medical checkup tura hruai nghal a ni a.
Minister Snthilbalaji hi Minister for Youth Welfare and Sports Development Udhayanidhi Stalin, Health Minister M. Subramanian leh PWD Minister E.V. Velu te chuan hospital ah hian tlawh nghalin Minister Sekar Babu chuan Senthilbalaji chu nikhaw hre lova awmin ICU-ah a awm mek a ti a. DMK Rajya Sabha MP leh senior advocate N.R. Elango chuan ED officials te chuan Senthilbalaji chhungte chu man a nih leh nih loh pawh an hrilh hre duh lo a ti bawk.
Udhayanishi chuan an party chuan dan hmanga chet lak zui an tum thu sawiin ‘BJP te nawr vaunaah hian tluk kan tum lo’ tiin a sawi a. Omandurar Government Estate-ah police tam zawk tirh luh a ni bawk.
June 13 khan ED te chuan State Secretariat-a Senthilbalaji official chamber chu an lo dap tawh a, hei bakah hian Chennai-a bungalow leh amah nena inkaihhnawihna nei Karur leh Cimbatore-a hmun thenkhatte pawh money-laundering case kal zelah an dap bawk a. Tun hi Central agency tena Minister bituma Fort St. George, seat of power an luhchhuah hmasakna ber a ni.
Congress president Mallikarjun Kharge leh DMK president leh Tamil Nadu Chief Minister M.L. Stalin te chuan Narendra Modi sorkar ‘intimidation tactic’ tiin an sawi a.
Congress President Mallikarjun Kharge chuan zan lai laia inman chungchang chu a dem thu sawiin, “Politics hawi innghaiskana leh Modi sorkarin anmahni dotute laka phuba a lakna vek a ni a. Hetiang thilah hian opposition te chu kan duai dawn lo” tiin a sawi.
Central agency te chuan engmah thuchhuah siam an la nei lo chungin tuna an chetlakna chhan hi kum 2011-15 laia Jayalalithaa Cabinet a nih laia Transport Minister a nih laia job racket kaihhnawiha money laundering awm nia sawi kaihhnawih nia ngaih a ni.
Metropolitan Transport Corporation ah hna inpek tiamin inthamna a thleng nia sawi a ni a. Thla kalta khan Supreme Court chuan chhui chian turin remtihna a pek tawh a ni.
Hetih lai hian Nationalist Congress Party supremo Sharad Pawar, West Bengal Chief Minister Mamata Banerjee, bakah Delhi chief minister Arvind Kejriwal, leh CPI(M) general secretary Sitaram Yechury te bakah Opposition leaders thahnem tak te chuan Enforcement Directorate (ED) tena Tamil Nadu’s Electricity Minister V. Senthilbalaji an dap thut chu an dem thu an sawi a. Agency te chet dan chu Central government in political lama a hmelmate tukdaih a tum nana thil kalpuina tiin an sawi.
Mamata Banerjee chuan Central agencies te dik lo taka hmanna tia sawiin ‘BJP te mangang thiltih a ni’ tiin a sawi bawk a.
“BJP ten DMK te laka phuba lak an tumna a ni a. Central agency hman sualna chu kalpui a ni zel mai. ED tena Tamil Nadu a Minister for Prohibition and Excise leh State Secretariat an luhchilh leh a chenna an luhchilh hi pawm theihloh a ni a. BJP te mangang thiltih a ni,” tiin Mamata Banerjee chuan a sawi.
Kejriwal pawhin BJP te chu phuba lak duhnain an mit a ti del tawh tiin a sawi bawk a. “BJP tena central agency te opposition te beih nan an hmang zui zel hi pawm theih a ni lo. ED tena Thiru V Senthil Balaji laka an chetdan hi ka dem takzet a. Khawhmu lek lova phuba lak tumna niin BJP te hian kan democracy tihchhiat vek an tum a ni,” tiin a sawi bawk.
Narendra Modi kaihhruai NDA sorkar chuan ED te chu Opposition leader te beih nan hmanruaah a hmang tia sawiin Yechury pawhin, “ED tena Tamil Nadu Minister for Prohibition & Excise Thiru Senthilbalaji leh State Secretariat, Chennai an luhchhuah hi ka dem takzet,” tiin a sawi bawk.
Stalin pawhin Secretariat’ luhchhuah chu federal principle kalh a ni, a ti a. “BJP te hian backdoor tactic hmangin politics lama an hmelmate hmehmih an tumna hian rah tha a chhuah dawn lo. BJP te hian zirlai harsa takin an zirchhuak vat dawn a. Mipui ten ngawi renga BJP te chetlak dan zahpuiawm zet an thlir reng hi namnul mai mai chi a ni lo. Kum 2024 inthlanpui hmaa BJP te chaklohna thlipui tleh hmaa boruak inmung mek a ni,” tiin a sawi.
Tamil Nadu Electricity Minister V. Senthilbalaji hmunhma vel an dap lai hian Minister chu a official residence ah khung niin armed paramilitary personnel ten rip taka an venna hnuaiah dah a ni a, a in luh leh chhuahna tin te venin a awm vek bawk.