TUMAH MIZO KAN NI LO…MAHSE MIZO VEK KAN NI

Rohmingliani
Kulikawn
Kan thupui khi a mak in tih ka ring. Khi thil mak tak khi sawifiah ka tum dawn a ni.
Tunlaia kan chhehvel, Myanmar, Bangladesh leh Manipur thil thleng hian rilru a ti na in, ngaihtuahna a kal thui duh hle mai. Ka rilru a ti na in, ngaihtuahna lo lut hi ka’n ziak ve rawih mai a ni.
Kei hi Lai, chutah pawh Bawitlung ka ni a. Lai tawng erawh ka thiam lo. Chutiang bawkin ka pasal (boral tawh) pawh Hmarah pawh Hmarlusei a ni a, hmar tawng a thiam bik chuang lo. (Pu R. Vanlawma lehkhabu KA RAM LEH KEI TIH, 4th Edition, phek 43 na-ah chuan Hmarlusei an intih chhan chu an (Hualngoho) chan a lo chauh tak avangin Hmar lam hla takah Hualngohmun atang chuan Thado lal an va bel a, chuta an awm lai chuan Lusei ringawt pawh an inti ngam tawh lova, ‘Hmarlusei’ an inti tiin a ziak). Ka nu lama ka pu chu Vanchhawng a ni a, ka pa lama ka pi chu Khawlhring a ni. Kan thenawmpa chu Hauhnar a ni a, kan thenawm lehlama mi chu Pachuau a ni. Ka thiante pawh Ralte, Chawngthu, Renthlei, Sailo, Zadeng etc. an ni. Tumah Mizo kan ni lo a nih chu. In hrethiam mai em?
Mahse maw, Mizo kan inti vek! A va mak ve! A chhan chu maw, hnam hrang hrang, chi peng hrang hrang ni mah ila, Mizo kan ni tih hi kan pawm thlap mai a ni. Tin, chi bing, chi peng leh hnam bil bikah, Chhinlung chhuak inti te zingah a hranpain Mizo hnam hi a awm reng reng lo. Chuvangin kan vaia thlah khat kan nihnaa, kan nihna intawm, tu hnam ta bik mah ni lo, MIZO tih hi a lo va tha em! Pathianin kan hnam hming atana min pek ngei a niah ka pawm hmiah. |awng thuah pawh Duhlian tawng kan tih, tuna Mizo tawng kan tih tak hi, Pathianin Mizote tana a lo ruat a nih ngei ka ring tlat a ni.
Hetianga Mizorama chengte’n kan pawm vang hi a ni ngei ang tunlaia thil thleng, Myanmar, Bangladesh leh Manipur-a chengte’n harsatna an han tawh a, kan u leh naute tia min rawn pan tak hi. Keini lahin hman atanga kan unaute kan lo tih thin tawh te’n tanpui an ngaihna laiah lo tanpuiin, kan lo tuamhlawmin kan lo mikhual a. Kan pi leh pute’n, “Dam leh tlang khatah, thih leh ruam khatah,” an lo tih thin kha hre rengin kan unaute tawrhna chu kan tawrhnaah ngaiin, kan rilru zawng zawngin kan tawrhpui tak meuh a ni. Bangladesh atanga lo lut turte BSF in an dang an tihte, Myanmar-a kan unaute leh Myanmar-a sipaite an inkap a, khua an hal tih te leh, Manipur kan unaute an that a, khua te halin biak in te pawh an hal tih kan han hriatte hian, kan thinlung a tap a ni.
Hnam ropui tak MIZO HNAM kan ni asin! A intei tê zawngin kal tawh lo ila, hnam tlem ni lovin, hnam ropui kan ni tih hi i hmu thiam teh ang u. Tam hi a pawimawh. Inhmangaih dial dial ila, i tangrual ang u. |anrual hi chakna a ni. Tlemte te ringawt chuan engmah kan ni thei loving. Chakna, zahawmna, thiltihtheihna leh ropuinate hi kan tam loh chuan kan nei thei ngai lovang.
Tin, ka sawi duh, pawimawh ka tih em em chu, min dotute lakah Pathian duh loh zawng leh thil dik lo chu i ti lovang u. Pathian hian Mizo hnam hi a hmangaih a, a hnam pumpui angin Kristian deuh vek kan ni a. Pathian hian Mizo hnam dinchhuahna atan thil dik lo hman hi rem a tih ka ring lo. Tunah pawh a dik lo zawk chu mite’n an rawn hre chho nghal tan zel a nih hi. |awngtaina nen lungrual taka Pathian au chungin a mi hruaina kawng zawh dik zel thei turin i bei sauh sauh ang u.
Hawh u, Kuki, Thado, Vaiphei, Gangte, Zomi, Hmar, Paihte, Lai, Mara, Lusei….. eng hnam pawh lo ni ila, Mizo vek kan ni tihah hian i chiang ang u. Keimahni tawng bil la hmang tho mah ila, Mizo tawng hi thiam ngei i tum bawk ang u.
Pathian thil rel dan hi a mak a, kan tan chuan han sawifiah theih chi zia zang a ni lo. Heng harsatna lo thleng te hi MIZO kan nihna hmu chiang tura kan mit timengtu atana Pathian ruat leh a hun tiama lo thleng ngei a nih ka ring tlat a ni. Chutih rual erawh chuan, kan unaute tawrhna hi a rapthlak a, kan tawngtainaahte hre reng ila. Tumah Mizo bik kan awm lo, kan vaiin Mizo vek kan ni tih hi i hre thar mawlh ang u.