EF&CC minister-in mamawh thlen

Environment, Forest & Climate Change minister TJ Lalnuntluanga chuan Nilaini khan Delhi-ah Union Minister of EF & CC Bhupender Yadav chu hmuin Mizoram mamawh hrang hrang a sawipui.
Forest department hnuaia fund pending hrang hrang – Wildlife Protection Squad hlawh, CSS-Integrated Development of Wildlife Habitat (IDWH) hnuaia thawktute hlawh bakah department kaltlanga hmasawnna ruhrel thawh hrang hrang, Project Tiger hnuaia fund pek tawh loh leh Satellite Wildlife Rescue Centre, Champhai Tlangsama dinna tur approval awm vek tawh fund la sanction lohte sanction thuai a nih theihna’n hma lakpui turin a ngen a. Hei bakah hian Forest department-in hmasawnna an neih theihna tur kawng awm theite a sawipui a ni.
Mizoram minister thu thlen hi Union minister chuan hma lak nghal a nih tur thu a lo hrilh a. Wildlife Sanctuary leh National Park pahnih, Murlen National Park leh Phawngpui National Park-a thawktute hlawh nikum atanga tang tawh chu chinfel thuai a nih theihna’n sanction order a siamtir nghal. Hei bakah hian heng National Wildlife Park pahnih chhunga wildlife habitat siamna tur leh developmental work thawhna tur pawh sanction tel a ni.
Champhai Tlangsama Satellite Wildlife Rescue Centre dinna tur approval awm tawh chu financial sanction a nih theihna’n Technical Committee-in kumin August chawlkar hmasa berah an ngaihtuah tur thu a lo hrilh a. Wildlife crime hrang hrang do na’na Wildlife Protection Squad dinna tura proposal a thehluh an pawm nghal thu a lo hrilh bawk. Khawpui hmun hrang hrang 14-a khawpui ngaw humhalhna tur project siam pawh pawm nghal a nih thu a lo hrilh.