Egypt leh Jordan-a Palestinian la lut turin Trump-a’n rawt
US President Donald Trump-a chuan Egypt leh Jordan ramte chu Gaza-a Palestinian-te an rama la lut mai turin a ti.
Trump-a hian Jordan-a King Abdullah chu hemi tur hian a ngen tawh a, Egypt president pawh Pathianni (India-a Thawhtanni) hian biak a tum.
Gaza chu ‘thil tihchhiat hmun’ tiin a sawi a, “Mihring maktaduai khat leh a chanve chungchang kan sawi a ni a, a zavaia kan thiar chhuah a ngai a ni,” a ti a. A ruahmanna chu ‘reilo atan emaw, rei zawk daih emaw’ pawh a ni thei tih a sawi.
Palestinian-te tan chuan Gaza hi an in a nih avangin Trump-a thu sawi hi an helh hle rin a ni a. Hamas leh Palestinian Authority pawhin he rawtna hi an dem thu an sawi nghal a. Jordan-a foreign minister chuan an lalram chu Palestinian tlanchhiate tan a ding tlat dawn tih a sawi a, rawtna pawm a nih leh nih loh a sawi lo.
Hamas-in October 7, 2023-a Israel an beih atanga Gaza-a indona chhuak chu inkahhai puan mek a ni a. Hamas-in Israel an rûnnaah hian mi 1,200 vel thatin mi 251 chu Gaza-a hren turin an hawn.
Israel-in an rûn zuinaah Palestinian 47,200, a tam ber civil mi an thi tih Gaza-a Hamas enkawl health ministry chuan a sawi.
Thla 15 chhung indona avang hian Gaza-a cheng maktaduai hnih vel chu an tlanchhian a, Gaza-a thil dingte chu a chhe deuh vek a ni.
United Nations chuan Gaza-a thil ding 60% vel chu an chhia niin a sawi a, din thar leh tur chuan kum tam tak a ngai dawn niin an sawi.
Trump-a hian a rawtna hi Air Force One-a a chuan laiin thuthar lakhawmtute hnena a sawi a ni.
“A zavai deuhthawin a tluchhua a, mi tam tak an thi mek a. Arab ram dang thenkhatte hi an inrawlh mai a tha zawkin ka hria a, thlamuang taka an khawsak theih nan hmun dangah in sa se a theih dawn a ni,” a ti.
Trump-a hian a rawtna hi thui a sawi lo va, White House atanga rawtna awm a ni em tih pawh hriat a ni lo.
“Gaza Strip-a kan Palestinian mite hian an ram kalsan lovin thla 15 chhungin thihna leh chhiatna an tuar a. Chumi hnua eng rawtna emaw awm hi an pawm thei lo vang, US President Trump-a’n ‘siam that leh chhung’ tia tha awm taka lang thleng pawh hian tih chi a ni lo,” tiin Hamas political bureau member, Bassem Naim chuan BBC hnenah a sawi.
West Bank atang pawhin Palestinian President Mahmud Abbas chuan ‘na takin kan hnawl a, eng project emaw hmachhuana Gaza Strip-a kan mite sawn tum hi kan dem hle a ni’ tiin a sawi ve nghal bawk.
US hian hun rei tak atang pawhin a foreign policy-ah Palestinian ram din hi a tum tawh a, chutah chuan Gaza pawh hi a tel a. Israeli Prime Minister Benjamin Netanyahu chuan hei hi a duh lo bur thung.
Hetih lai hian Gazan-te an thenawm rama sawn chhuah hi hnama kal na tak, Netanyahu-a sorkara member tam takin an duh a ni.
Israeli Finance Minister Bezelal Smotrich chuan Palestinian-te an thenawm rama dah chhuah an nih chuan Judaten Gaza hi luahin an tung dung leh thei dawn niin a sawi nghal.
Palestinian tam tak chuan President Trump-a hian na zawkin Middle East-ah thil a kalpui ang tih an hlau hle nghal.
US chuan tun hma kha chuan Gaza leh Israel-in a awp West Bank atanga Palestinian-te um chhuah hi a duh ngai lo.
Tunah hian Palestinian raltlan maktaduai hnih chuang chu Jordan-ah an awm a, tam tak chuan khua leh tui nihna pawh an nei tawh niin UN chuan a sawi a. Heng mite hi kum 1948-a Israel a lo pian laia buaina chhuak zui avanga an in leh chhuahsan Palestinian 7,50,000 vel thlah kal zel kha an ni.
Tun tuma indona a chhuah pawh khan Palestinian sang eng emaw zat chu Egypt-ah hian an tlanchhia a, raltlan anga chhiar erawh an ni lo.
October, 2023 khan Egypt President Abdel Fattah al-Sisi chuan tihluihnaa Palestinian-te Sinai peninsula-a dah chu a duh lo tih a sawi a, thil tha ber chu an pual ram siam a ni tih a lo sawi tawh.
Israel-ah ve thung chuan hnam la na pawl tam tak chuan Gaza-a kir lehah luah leh an la duh reng a. Israel hian kum 2005 khan an mite awmna hmuh 21 thiatin mi cheng 9,000 chuang chu sipaiin a thiar chhuak a ni.
Egypt leh Jordan-a Palestinian la lut turin Trump-a’n rawt
Get real time updates directly on you device, subscribe now.