Sam tla nasa hi a ninawmin a buaithlak ve thei khawp mai. I sam i khuih apiangin samkhuiah samzai a tang nghal teuh zel mai te hi a ninawm ve thei hle a ni. |henkhat phei chu sam a tlak nasat deuh chuan kan ngaih te a tha lo a, kan lu a kawlh tul mai ang tih te kan hlauthawng thin. Sam tla nasa enkawl nan cheng tam tak tak kan seng a, oil leh cream chi hrang hrang manto tak takin kan lei thin. Mahse, mithiam te chuan kan sam tlak nasatna chhan hi kan ei leh in vang a ni thei niin an sawi tlat mai.
Times of India health section-in mithiam te zirchianna chungchang a tarlan danin sam tla nasa ten iron an tlachham duh hle a ni. Hei hi 2006-a mithiam te zirchianna lo neih daih tawh a ni a, iron tlakchham vanga sam tla nasa an ni em tih erawh an finfiah lo va, mahse, sam tla nasa ten iron an tlachham deuh zel tih erawh an hmuchhuak a, chubakah vegetarian zingah sam tla nasa an tam duh lehzual niin an sawi a, anni hian iron tamna sa lam chi an ei lo. Chuvangin, sam a tla nasa a nih chuan, a chhan chi hrang hrang awm theih zingah iron tlak chham vang pawh a ni ve thei.
Iron hi red blood cell-in hemoglobin a siam nan a pawimawh. Iron kan tlakchham chuan taksaah oxygen a lo tlem ang a, oxygen chu sam than nan leh a in-repair nana pawimawh a ni si a. Chuvangin he nutrient hi kan tlakchham chuan samin a tuar ngei ngei thin. I sam a tla nasa a nih chuan iron tamna chaw han ei uar deuh la, a chhan dang eng emaw vang te a nih loh chuan a ziaawm ve leh mai dawn a ni.
Iron hi chihnih a awm a, sa atanga kan hmuh theih heme iron leh thlai leh sa atanga kan hmuh theih non-heme iron te an ni. Kan taksa hian non-heme iron aiin heme iron hi a hip tha thei zawk a, chuvangin vegetarian ten iron an tlakchham phah fo thin a ni. Vegetarian tan chuan iron tamna broccoli, bean, thlaihnah hring duk, leh quinoa te hi ei tam a tha, hei bakah hian doctor rawn chungin iron supplement pawh ei theih a ni.
Sam tlak nasatna chhan chu iron tlakchham vang vang ngawr ngawr a ni lo ve thei a, a chhan chi hrang hrang a awm thei a, stress vang te, kum a lo upat ve tak vang te, kan damdawi ei eng emaw vang te, hormone inthlak danglam vang te pawh a ni thei tih erawh hriat tel tur a ni.
Ei leh in leh sam tlain inkungkaihna a nei em?
Get real time updates directly on you device, subscribe now.
Prev Post