Chief minister Lalduhoma chuan central sawrkar thara mi pawimawh hrang hrang leh All Finance Ministers’ Meeting-a tel turin Ningani tlai khan Delhi a thleng a. Union Home minister Amit Shah chu a chenna inah a hmu nghal.
Cyclone Remal-in Mizorama chhiatna hrang hrang a thlenah Union Home minister hnenah memorandum a thehlut a. Union minister hian a hmuna endik tur Central Team a rawn tir anga, report an thehluh veleh chhawmdawlna an ngaihtuah tur thu a lo hrilh.
Raltlan chungchangah sawrkar laipuiin chhawmdawlna pek an tiam tih a lo hrilh bakah Assam Rifles sawn chhuah chungchang pawh sawi dunin, Home minister chuan thutlukna siamfel a ni tawh a, an insawn ngei dawn tih a lo hrilh a. Hemi bawhzui hian chief minister chuan Mizorama a haw hunah Assam Rifles, Home, PHE, PWD leh P&E department-te joint meeting a ko dawn a ni.
Mizoram sawrkar hnuaia thawk tur Mizo central service officer-a dilte tihhlawhtlin sak ngei a tum thu Amit Shah hian a sawi a. Chief minister-in kumin August thla chhunga Mizoram tlawh tura a sawmna pawh tihhlawhtlin a tum tih a hrilh a ni.
Chief minister Lok Sabha MP Richard Vanlalhmangaiha, commissioner & secretary to CM Vanlaldina Fanai leh OSD to CM Jonathan Lalremruata ten an tawiawm.
Union Home minister nen an inkawm zawhah Lalduhoma hi Intelligence Bureau director Tapan Deka chuan Mizoram House-ah a rawn hmu a, Mizoram harsatna hrang hrang an sawi dun a ni.
CM-in Union Home minister hmu Assam Rifles an insawn ngei dawn
Get real time updates directly on you device, subscribe now.