Ei rawngbawlna gas man Rs. 29-in to leh, eptute phun nasa
Pathianni khan thla thum chhunga a vawi hnih ei rawngbawlna gas man chu Rs. 29-a tihsan leh a ni a, Middle East-a February 28-a indona a chhuak chuan India-ah hian ni tin mamawh, a bikin tuialhthei man a nghawng nasa hle a. Tun tuma LPG man tihsan hi eptu party-te chuan sorkar sawisel nan an hman phah mek.
March thla tir lam khan US leh Iran indonain khawvel pum huapa energy man a tihbuai avangin Delhi-ah ei rawngbawlna gas man hi bur khat Rs. 60-in tihsan a ni.
Middle East indona vangin ram chhunga ei rawngbawlna gas man a to zel a, hei vang hian eptu hruaitute chuan sorkar chu an sawisel a. Hetih mek lai hian sorkar chuan Indian chhungkaw tinten an thenawm ram leh economy hmasawn thenkhata mite aiin a man an tihsanna a tlem zawk zel niin an sawi.
Tun hnaia LPG man tihsan chungchangah Congress President Mallikarjun Kharge-a chuan ram chhunga ‘mi nawlpui choka hal a ni’ tiin a sawi.
Kharge-a chuan thla li kalta chhung khan Rs. 89-in a man a sang tih sawiin mi pangngai chu thil man sang phurrit hnuaiah an awm mek tih a sawi.
Congress kaihhruai UPA rorel laia BJP-in kawtthlera nawrh an huaihawt dante hre chhuakin X-ah Narendra Modi sorkarin kum 12 kalta chhung khan ram chhunga LPG man Rs. 530-in a tihsan tawh thu a tar lang a, “Chuti a nih chuan engvangin nge tunah hian BJP hruaitute chu bur nen kawngpuiah an thut loh?” a ti.
“Ram chhunga LPG man sang chho zel hian mipui nawlpui choka a hal mek a. Thla li kalta chhung khan Modi-a sorkar chuan ram chhunga LPG cylinder man hi Rs. 89-in a tisang tawh a ni,” a ti.
“Parliament-ah khan Pu Modi-a hian Asia khawthlang indona avangin ram 41 atangin tuialhthei lak luh a nih thu a lo sawi tawh a. Eng nge thleng zui ta? Engvangin nge tun thlengin thingtlang lamah LPG an la tlakchham?” a ti bawk.
Kharge-a’n ‘thla li’ kalta chhunga thil man tihsan chungchang a sawi laiin Congress telin hruaitu dang leh eptu party tam zawk chuan thla thum kalta chhunga thil man tihsan chungchang an sawi a, March 7 atanga tan a ni.
Mamata Banerjee-i kaihhruai Trinamool Congress pawhin LPG man tihsan chungchangah sorkar lakah an sawisel a, a man tihsan hi chhungkaw maktaduai tam tak, sum hman tur lo inruahman fel tawhte tan ‘nasa taka tawrhna dang’ a nih thu an tar lang a. “Hei hi BJP kal dan a ni a, khawvel buaina a lo chhuah hian mi retheite chuan an lungngai reng a, mi hausa erawh chu an hlawhtling zel thung,” tiin X-ah an tar lang.
Samajwadi Party (SP) chuan BJP kaihhruai sorkar laipui hi na takin an sawisel a, mipui chu ‘BJP-in a khalh thil man sangin’ a tihbuai thu an sawi. “Thla thum lek chhungin LPG man chu Rs. 89-in a man a to tawh a, engtikah nge mipui rawkna hi a tawp ang? BJP paih bo la, ram chhanhim rawh u,” tiin party chuan X-ah an tar lang.
Ei rawngbawlna LPG man chu tihsan a nih hnuah Pathianni khan petroleum & natural gas ministry chuan Indian chhungkuain ei rawngbawlna gas man hi an thenawm ram leh economy hmasawn ramte aiin a la tisang tlem niin a sawi.
Ministry chuan Pradhan Mantri Ujjwala Yojana (PMUY) atanga beneficiary pakhat chuan LPG kg 14.2 man atan Rs. 642 a pe tih a sawi a, Delhi-a general consumer chuan Rs. 942 a pe thung a. Tunah chuan cylinder khat supply man tak tak chu Rs. 1,600 a pel tawh a ni.
Ministry sawi danin India-a petroleum product man hi khawvel pum huapa a man nen a inzawm a. Sorkar chuan LPG atana chhungkaw tinten a man an pek chu a sang lo thei ang ber zel a nih thu a sawi.
Chhungkuain Rs. 942-in bur an lei a. PMUY beneficiary-te hian kum tin a thun khahna hmasa paliah bur khatah direct benefit transfer Rs. 300 an dawng bawk a, hei hi a tlangpuiin Ujjwala chhungkaw pangngai kum khata an hman zat a ni a. Hei vang hian thun khat nan Rs. 642 an pe niin sorkar chuan a sawi.