Eirawng bawl rei record siam

Eirawng bawl rei record siam
Nigerian chef Hilda Effiong Bassey, Hilda Baci tia hriatlar chuan ‘mahni chauha eirawng bawl rei ber’ record a siam a, darkar 90 chhung eirawng a bawl! A hmaa hetiang record siamtu chu Lata Tondon a ni a, ani hian darkar 87 leh minute 45 chhung eirawng a bawl ve thung.
Hilda hian Ningani tlai lam dar 4-ah eirawng hi bawl tanin, a cooker chhuan tan atang chiahin hun chhiar tan a ni a, Thawhtanni tuk thleng a bawl ta ngat ngat mai a ni. Hilda hian darkar 90 eirawng a bawl hnuah pawh a la duhtawk mai lo va, darkar 96 thleng bawl tumin a bei chhunzawm ta zel a ni.
He Nigerian chef hian Lagos, Nigeria-ah record hi siamin, a record siam thu hi Nigerian media ten an puang nghal sup sup a, mahse, Guinness World Record lam chuan record hi an la pawm nghal mai lo va, an endik ve leh phawt dawn a ni. Guinness guideline-ah chuan darkar khat eirawng bawlah minute 5 zel a chawl thei a, a chawlh hi a khawl thei bawk a, he a chawlh neih chhung hian inthiar leh intihfai te leh ei leh in bakah mut thlengin a tihvek a ngai a, a eirawng bawl hi thil ei tlak ngei a nih a ngai a, chu mai bakah a tui ngei tur a ni bawk!