Guardian of the Galaxy-in Box office-a a dinhmun la humhim
Guardian of the Galaxy-in Box office-a a dinhmun la humhim
James Gunn film siam Guardians of the Galaxy Vol.3 chuan North American box office-a a dinhmun humin, a kar hnih nan a No.1, an tlangzarh atanga weekend vawi hnihnaah cinema hall ticket hralhna atangin dollar maktaduai 60.5 lalut lehin, hei hi box office-ah a No.1 pui leh ta a ni. Tihian US-a kar hnih chhunga a lakluh chu dollar maktaduai 213.2 a lalut tling ta.
US pawn lamah pawh a la che tha viau a, ram hrang hrang 52 atangin dollar maktaduai 91.9 lalut lehin, tihian US pawna a lakluh zawng zawng chu dollar maktaduai 315.6 a tling tawh a, US-a a lakluh nen chuan dollar maktaduai 528.8 a tlin ta a ni.
Box office-a kar ruk chhung No.1 thei The Super Mario Bros. Movie chuan dollar maktaduai 13 lalut lehin, No.2 a la ni a, he animated film hian US-ah dollar maktaduai 536 lalut tawhin, US pawna a lakluh nen chuan dollar tluklehdingawn 1.21 a tlin ta a, Minions lehpelin, animated film zinga sum lak luh tamah palina a ni pha ta a ni.
Film tlangzarh thar ‘Book Club: The Next Chapter’-in dollar maktaduai 6.5 lalutin No.3 a ni a, a film hmasa zawk 2018-a an tlangzarh ‘Book Club’ kha chuan opening weekend-ah dollar maktaduai 13.6 a lalut pha. He film hi Candice Bergen, Jane Fonda, Diane Keaton leh Mary Steenburgen te channa a ni.
Evil Dead Rise-in dollar maktaduai 3.7 lalut lehin No.4 a ni a, US-ah dollar maktaduai 60.2 lalut tling tawhin, US pawna a lakluh nen chuan dollar maktaduai 131.8 a tlin ve tawh bawk.
Box office top 5 khartu chu ‘Are You There God? It’s Me Margaret’ niin, dollar maktaduai 2.5 lalut lehin No.5 a ni a, kar thum chhungin US-ah dollar maktaduai 16.5 a lalut tling ve ta a ni.
Film tlangzarh thar Ben Affleck channa, sci-fi action-thriller ‘Hypnotic’-in beisei a pha lo va, dollar maktaduai 2.4 lalutin No.6 a ni a, Ben Affleck channa-ah chuan opening weekend-a US-a sum lalut tlem ber a la ni.
Box office top 10:
1 Guardians of the Galaxy Vol 3 $60,500,000
2 The Super Mario Bros. Movie $13,000,000
3 Book Club: The Next Chapter $6,500,000
4 Evil Dead Rise $3,728,000
5 Are You There God? It’s Me, Margaret $2,500,000
6 Hypnotic $2,355,000
7 John Wick: Chapter 4 $1,930,000
8 Love Again $1,550,000
9 Dungeons & Dragons: Honor Among Thieves $740,000
10 Sisu $511,000