“Eiru lo tura intiam ngam kan chhawpchhuak”

ZPM chuan eiru lo tura intiam ngam chief ministerial candidate an chhawpchhuak tih AMC-a ZPM corporator R Lalawmpuii chuan a sawi.
Inrinni zinga Chaltlang leh Durtlang Dawrkawna street campaign an neihnaah ZPM Zonu president ni bawk R Lalawmpuii chuan kan aiawha kan thlante hian mipui nge an ngaihpawimawh anmahni zawk, kan thlanchhuahte nge hma sawn chak a, a thlangtu mipui tih kan inzawh thar fo a tul tih a sawi.
Dik taka hna thawh chuan sum tlemte pawhin hna tha leh tangkai a thawh theih a, ram sum leh pai chu kohhran sum hman anga daihzai leh tangkaia hman a nih hunah chuan vawiina kan harsatna tam tak hi sutkian a nih a beiseiawm, tia sawiin, sawrkar chu mipui ta, sawrkar sum chu mipui ta a nih avangin a hman dan kawngah pawh beng kan chhit a, kan thikthu a chhiat a tul ta hle tih a sawi bawk.
“Sawrkar sum party sum emaw ti mai party kan hmu nual tawh a, he kalphung hlui hi kalphung thara kan thlak ngam a ngai ta. Kan sawrkar hrawn tawh ten ram tan theihtawp an lo chhuah tawh a, hei aia tha zawk mipuiin kan beisei avangin kalphung thar mipui sawrkar siam turin kan inbuatsaih mek a ni,” a ti.
Ramin hruaitu lu ber tha a mamawhna a sang hle, tiin R Lalawmpuii chuan, “Chief minister tha pakhatin ram a siam danglam nasat theih zia kan hre theuh a, hruaitu tha lo hnuaiah mi tha ten awmzia an nei lo fo. Mi tha, an thatna hmang tangkai turin chief minister eiru lo tura intiam ngam ZPM chuan kan chhawp chhuak a, politics tuinu thianfai a, Pathian thu leh politics inrem taka a kal theihna turin kalphung thar mipui sawrkar siampuiah mipui ka sawm a ni,” a ti.