Eiruk tlemna state

Transparency International leh NITI Aayog data behchhana CMS India Corruption Study-in a zirchiannaah, Mizoram chu India ram state leh union territory-ah Lakshadweep dawta eiruk tlem berna a ni, tiin chief minister Pu Lalduhoma chuan tun hnai khan a sawi a. Hei hi eng kum nge tih chief minister hian a sawi lang chiah lo na a, corruption chungchanga India ram dinhmun ‘Corruption Perception Index 2024’ a tarlan avangin kum kal ta lam kha a nih a rinawm.
Tun hnaia internet lama “Most corrupt state in India list 2025” tarlannaah chuan Rajasthan a sâng ber a, a tehkhawngah 78% a kai a; Kerala state chu eiruk tlemna ber niin 10% a ni ve thung a. He list an siamnaah hian hmarchhak state-ah survey an rawn nei ve lo a nih a rinawm a, NE state kan lang lo vek.
India ram state leh UT 36 zinga eiruk tlem berna dawttu kan ni hi engti zawnga dawnsawn tur nge tih hriatthiam a harsa viau maithei. State hrang hrangte nena khaikhinna dawhsan atang chuan ‘a lawmawm’ te pawh a tih theih ang. Mahse, eirukna a nih tawh chuan a tlem emaw, a tam emaw thil dik lo a nihna hrim hrimah thil huatthlala tak, dan kalh, hmasawnna daltu a nih piah lamah mipui tawrhna thlentu a ni tel bawk a, engti kawng maha ngaihzam theih a ni lo.
State dangah chuan eirukna tehkhawng a lo sang viau a nih pawhin, ‘keini state chu kan la ziaawm alawm’ tia ngaih tih that ngawt chi a ni lo a. Mizorama eirukna dinhmun hi Kerala eirukna dinhmun tehkhawng 10% aia hniam deuh zawk in, entir nan 9% te lo ni ta se, “Mizorama eirukna te hi chu a lo tlem em mai” tia state dang nena inkhaikhin hi inthiamna tur chi pawh niin a lang lo.
Sawrkar inrelbawlna han en hian, Mizoram te hi chu ‘Zero Corruption’ pawh ni se, sawrkar hnathawkte hlawh leh sawrkar department hrang hrangte inenkawlna atana annual budget atanga 80% vel a ral zel avang hian, a bak 20% vel hi state pakhat ve riang ruang enkawlna atan chuan a beitham lulai lutuk a, chutih laia 20% atanga eirukna a la awm lehzel a nih chuan, “Least corrupt state” pawh ni eng ang mah ila, inchhuanna tur emaw, lawmna tur emaw hi a awm reng reng lo.