Eirukna leh Mizoram

Mizoramin hma a sawn tur anga hma a sawn loh chhan chu Eirukna vang a ni, tih bawl bawl theih tur khawpin Mizoramah hian eirukna a hluar tawh a. Eirukna a hluar tih hriatna langsar tak pakhat chu, inthlan dawn apiangin political party tinin eirukna an do thu leh, sawrkarna an siam chuan an eiruk ve loh tur thu emaw, eirukna an nuai bo tur thu emaw mipui hnenah an sawi thin a. Pawl hrang hrang leh kohhran hrang hrangten eirukna an do thu auchhuahpui miah lo mah se, political party zawng zawngin inthlan campaign auhla pakhata eirukna an do tur thu an puan thin atang hian ‘eirukna a hluarzia’ hi tim map lovin a sawi pang pang theih dawn tho tihna a ni.
Eirukna a lo awm theihna chhan hi kawng khat chiah a awm a, chu chu tihdan tur (system) anga tih loh vang, tiin a sawi theih ang. System anga kal tur chuan kha system khan zawm a hlawh em tih enfiah a tul a, chumi enfiah tur chuan hotu lian zawk thuneitute an pawimawh a, thuneitu berin system a kenkawh that loh chuan corruption a intan nghal tihna a ni awm e. System tha tak kan nei a, mahse eirukna a hluar kan la tih reng si chuan, system kan zawm tha lo hle tihna a ni.
Sawrkar hnathawk hotu lu ber chief secretary-te hian an office an luah hmasak ber ni-a an sawi thin chu ‘punctuality’ hi a ni thin a. Hotu lu berin hun a vawn dik a, a hnuai amiten hun an vawng dik ve em tih thahnemngai taka a vil zui tlat chuan, punctuality kha a kal dik mai. Mahse, punctuality kan hmu em le?
Chutiang bawkin, minister berin a portfolio hnuaia hna chi hrang hrangah a nihna tur angin system zawm that a ni em tih thahnemngai taka a vil that miau chuan, a enkawl department hnuaiah hmasawnna a nih dan tur angin a kal ngei ngei ang. Mahse, chutiang dinhmunah chuan kan ding lo a ni ang chu, election campaign auhlaah ‘eirukna’ kan la ti chuah chuah reng si a.
Ram inrelbawlna hna thawh dan tur system tha tak tak kan neihsate hi a nih tur angin zawm a ni em tih vil that a, kenkawh that hi eirukna bawhbehna tur chu a ni mai a, chu chu kan tih loh thin avangin ‘eirukna’ hi a thleng reng mai a ni ber e.