Election Expenditure

Election Commission of India tirha Mizoram inthlan vil tura ruat Expenditure Observer-te chuan tun lai hian district hrang hrangah Expenditure Monitoring team-te ko khawmin hriattur pawimawh hrang hrangte inhrilhna hun an hmang mek a.
ECI hian election felfai a awm theihnan inthlan senso tur bithliahin Assembly Constituency candidate tinin cheng nuai 28 aia tam an hmang tur a ni lo a ti a; hei hi state dinhmun azirin cheng nuai 40 thleng bithliah a ni a. Lok Sabha constituency candidate tin tan erawh nuai 70 thleng phalsak a ni thung. Hetianga inthlan senso zat tur bithliah a nih chhan hi, party lian leh hausa zawkte leh party tenau leh sum nei tlem zawkten intluk tlang taka election an hmachhawn theih nana tih a ni. Representation of the People Act (RPA), 1951 hnuaia Section 77 chuan, inthlana candidate tin ten nomination an tihfel atanga result puan thlenga an senso an ziak fel thlap ang a, chu chu ni 30 chhungin ECI-ah an thehlut tur a ni, tih a ni a. Expenditure dik lo a awm a nih chuan kum thum thlenga candidate disqualify theih a ni.
Tunhma deuh kha chuan, ‘cheng chuti zat ka sen chuan ka tling ang’ tih tawngkamte kha hriattur a awm nawk thin a; voter lei nana sum fai chelek te pawh an awm thin nia sawi a ni bawk. Khatih hun lai khan, voter zingah, ram inrelbawlna kalhmang thui tak thlir pha lem lova, ‘sum ngah ngah hmeltha’ tih tlawhchhana inthlan hmachhawn mai mai duh tawk kha an la awm thin niawm tak a ni.
Khatiang boruak hnuaiah kha chuan, ram inrelbawlna hna thawk tura mi tling tak tak, mithiam, fel leh tha tak tak, mahse sum sen tur neih ve loh avanga inthlan hmachhawn ve ngam lo/pha lo kha a awm theih ang tih a rinawm a. Hausa, sum ngah apiang an tling zel mai a nih chuan ramin a chhiatpui thuai dawn tih a lang reng a ni. Tuna hetia ECI-in election expenditure fet deuh zawka a thlithlai thin hi ram tan thil tha tak a ni.
Election expenditure hi — public meetings, rallies, advertisements, posters, banners, veivahna lirthei leh a behbawmte a ni tlangpui a. ECI-in expenditure zat tur a bithliah huang chhungah hian election campaign hi a kalpui theih ang tih a rinawm a, sum nei vak lo tan pawh, cheng nuai 28 seng theite nena campaign activity inthlau em em lo tura ngaih a ni awm e.
A pawimawh ber chu, campaign expenditure aiin ram kaihhruai dan tur tha hmanga mipui rilru hneh a ni a; mipui lam pawhin rik bung bung lam hi tehkhawnga hmang lova, mahni chhia leh tha hriatna thiang tak hmanga ‘hei hi ka duh ber’ ti chat thei tura ngaihtuahna sen ve hi keimahni tan bawka tha tur a ni tih hre chungin aiawh hi thlang thin ila; chutianga tih takzet rilru pu chunga vote kan thlak phawt chuan Chunglam pawhin mal a sawm ngeiin a rinawm tlat a ni.