Election hun leh vote chhiar hun
Nimin October ni 9 khan Election Commission of India chuan state panga— Mizoram, Chhattisgarh, Madhya Pradesh, Rajasthan leh Telengana te inthlan hun leh result puan hun a puang ta a. State pangate inthlan hun hi inang vek lo mah se, kumin November thlaa inthlang fel vek tur kan ni a, December ni 3, 2023-ah a rualin result puan a ni dawn ta a ni.
Result puan ni tur hi Kristiante ni pawimawh Chawlhni a ni leh tlat mai a. Hemi chungchangah hian nimin khan MNF leh Mizoram Congress chuan Chief Election Commissioner, ECI hnenah lehkha thawn nghalin Decemebr ni 3 Sunday chu Kristiante ni pawimawh a nih avangin result puan hun hi Sunday ni lovah a hun sawn turin an ngen nghal a. Political party dang leh Mizorama Kohhran hrang hrangte pawhin inthlan result puan hun sawn tur hian an la ngen zel ngeiin a rinawm bawk.
Inthlan zawh hun hi a inang lo zung mai a, inthlang zo hnuhnung ber tur Telengana hian November ni 30-ah an zo chauh dawn a, November ni 7-a lo inthlang fel tawhte tan chuan rei tak lo nghah ngar ngar a ngai dawn a. Election Commission of India pawh hian inthlang zo hnuhnung ber Telengana inthlan zawh atanga rei rial tawh lovin a ni 3-naah result puan hun tur hi an ruat niin a lang a. Result puan hun tur an rel lai hian December ni 3 hi Sunday a ni tih Calendar atangin an hre ngei ang a. Sunday hi Kristiante ni pawimawh a ni tih pawh an hai hauhin a rinawm loh a; chuvangin hei hi tih luih anga ngaih theih a ni. A hun sawn tura ngenna a lo awm takah chuan, ECI tan pawh result puan hun ni khata han tawlh hlat zeuh hi a harsa lo tura ngaih a ni.
Inthlan hmasa 2018 khan inthlan hun puan ni kha October 6 niin, November ni 28-ah vote thlak a ni a. Tun tumah hian October ni 9-ah inthlan hun puan a ni a, November ni 7-ah vote thlak tur a ni ta a. Inthlan hmasa ai khan tun tum inthlan puan ni leh inthlan ni inkar rei zawng hi a tawi ta hle a. Inthlan hmasaah khan a karah ni 52 tla ang a ni a, tunah hian ni 30 tla ang a ni. Eng pawh ni se, inthlang tur kan ni tih hre lawk sa vek kan nih avangin helaia a danglamna hi chuan political party-te harsatna a siam lo turah a ngaih theih awm e.