Electric current leak-ah mi chhan tumtu nunna chan

Electric current leak-in mi a man avanga chhan tumtu chu lo man ve lehin, a nunna a chan phah.
Thudawn danin, October 28 zan dar 11.30 vel khan Tuikual South Section I-a C Tawna in bulah scooter-a inphur mi pahnih chu kawngsira tlaliamin electric current hian a man a, current man vanga tla leh, an tlak hnu ah current hian a lo man erawh hriat a ni lo.
C Tawna building veka leng, FC Vaveitlochai (33) s/o FC Tlakho, Chakhei Tipa, Siaha district chuan an tlabuai hi hmu in chhan tumin a kal a, a ni pawh hi electric current hian a lo man ve leh a, a nunna a chan phah a, a tira midang pahnih hi chuan hliam tuarin an nunna atan a hlauhthawn awm loh nia sawi a ni.
Current leak hi mimalin electric current an pawhna hrui leh rangva intawk vang nia sawi a ni a. Power & Electricity department chuan electric current leak dan hi enfiahin an siamtha nghal tih sawi a ni.