Thudik lo in MNF-in Duhoma an bei chiam – ZPM

MNF party-in policy leh manifesto an neih mumal tawh loh avangin an party leh an leader Pu Lalduhoma chu thudik lo hmangin an bei chiam mai tih ZPM chuan an sawi.
ZPM Gen. Hqrs. thuchhuak chuan, MNF hian tunhnaiah Pu Lalduhoma hi thudik lo leh belhchian dawl lo hmangin an bei nasa a. An bei duh a nih pawhin rinthu leh thudik lo ni loin, thudik leh belhchiandawl ni thei se an duh tih a sawi.
Thudik lo pawh pawisa loa an bei chiam chu kum 2018-a an intiamnaah tihhlawhtlin mumal sawi tur an nei lo leh tun inthlan turah policy leh manifesto sawi tur an neih loh avanga Pu Lalduhoma chunga tuan taah an ngai a. Mipuiin sawrkar tura an ngaih ZPM leh an leader sawichhiat chu an policy pui ber a ni ta tih a sawi a ni.
Ram tana an hmachhawp leh an tih tum pawh sawi ngam tawh lo khawpin kum 5 chhung ram an lo kaihhruai rah MNF hian an tel mek tih sawiin, ‘An chhuanlam ber Covid lah chhuanlam tling a nih loh zia mipuiin an hrethiam tawh. Cheng vaibelchhe 3000 dawn Covid avanga sum hmuh tur hmu kim lo anga an insawi thin chu hailan sak niin, Covid chhuanlama kan sum hmuh loh an sawi ziah vbch. 2636.52 leh kan dawn belh zat vbch. 2563.17 inthlauhna hi vbch. 73.35 chauh a ni. Heng zingah hian a bungrua leh hmanrua ang zawnga kan dawn leh mipui, tlawmngai pawl leh kohhran thawhkhawm a la tel lo a. Vawiin thlengin khawi state mahin Covid hi chhuanlamah an hmang tawh lo,’ a ti.