Ella Langley “Choosin’ Texas” record siamin a No.1

On Sep 2, 2026 2 0

Ella Langley hla hit “Choosin’ Texas” chu Billboard Hot100 (US singles) chart-ah a No.1 a, he chart-ah hian kar 20 a No.1 tling ta a, Krismas rimnam hla ni lo zinga he chart-a No.1 ni rei thei ber a ni ta. He hla hi kumin February thla khan a vawi khat chart-ah a rawn No.1 a, chuta tang chuan a zawn lovin kar 20 a No.1 tling ta a ni.
“Choosin’ Texas” hian he chart-a No.1 nih rei theihah hla pakhat chiah phak loh a la nei a, chu chu Mariah Carey Krismas lengzem hla “All I Want for Christmas Is You” niin, he hla hi 2019-2026 chhungin kar 22 a No.1 tling tawh.
Kar kalta chart-ah khan Ella Langley “Choosin’ Texas” hian Saboozey “A Bar Song (Tipsy)” leh Lil Nas X feat Billy Ray Cyrus “Old Town Road” nihrualin, kar 19 a rawn No.1 a, an pathum hian Krismas rimnam hla ni lo zinga he chart-a No.1 ni rei ber record an ni a, tunkarah Ella Langley hian a kalsan ta a, amahin record a siam ta a ni.
“Choosin’ Texas” hla hi Langley bakah Luke Dick, Miranda Lambert leh Joybeth Taylor te phuahho a ni a, Langley chuan, “He hla hi kan phuah lai atangin an ngaina nghal khawp mai a, mahse, hetiang boruak hi a tawng phain, a thleng thei ang tih rin lawk ngaihna kan hre reng reng lo. Mellung thar thlengin, lawm tur thil thar a siam deuh reng mai a nih hi,” a ti.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni a, heng data ho independent data provider Luminate data Billboard hian an hmang thin.
“Choosin’ Texas” hian kar khat chhungin official stream maktaduai 24.2 neiin, radio airplay ngaithlatu maktaduai 56.8 leh sales 7,000 a la kai thei a, hei hi a kar 20 nan chart-ah a No.1 pui leh ta a ni.
Stella Lefty “Boston” chu No.2-ah bawk awm lehin, Taylor Swift “I Knew It, I Knew You” pawh No.3 a la ni a, Morgan Wallen “Been by Now” pawh No.4-ah bawk a la awm a, chart No.1 atanga No.4 chu country hla a ni a, tihian tun kar 13 chhung chu chart No.1-3, No.1-4 emaw No.1-5 emaw chu country hla a ni zel a ni.
Chart No.1 hlui Ariana Grande “Hate That I Made You Love Me” pawh No.5-ah bawk a la awm a, Tame Impala leh JENNIE “Dracula” chu No.8 atangin No.6 a kai thar leh ta a, Olivia Dean “So Easy (To Fall in Love)” chu No.7-ah bawk la awmin, Wallen leh Langley “I Can’t Love You Anymore” chu No.6 atangin No.8-ah a tawlh a, Olivia Dean hla dang “Man I Need” chu No.9-ah la awmin, Langley hla dang “Be Her” chu top 10 khartu niin, No.10-ah bawk a la awm.