Hmeichhe naupangin hula hoop record siam

Hmeichhe naupangin hula hoop record siam
Jaipur, Rajasthan a cheng hmeichhe naupang Sinaya Biyani, kum 7, Jaipur ooper tia a hminglem an phuah sak hial chuan Guinness World Records bu-ah a hming a ziak lut ve ta. He hmeichhe naupang hian second 30 chhungin a banah hula hoop vawi 101 a tivirkual hman a, Guinness World Records-in tleirawl kum16 hnuailam zinga second 30 chhunga bana hula hoop ti vir tam thei ber record-ah a puang. A hmaa hetiang record chu second 30 chhunga vawi 94 a ni.
Sinaya Biyani hi a vanneih hrim hrim avanga record siam a ni lo a, hetiang record siam tum hian thla thum chhung tih takzetin a zir niin a sawi a, a evidence neih te chu Guinness-ah thawnin, annin uluk theih tawpin an an en dik hnuah record a siam thu an hriattir leh ta a ni.
Sinaya hian record a siam vawi khatna a ni a, mahse, a thiam thil hi hmun hrang hrangah a lo entir ve tawh thin a, live show 45 chuangah a inlan tawh a, IIT Jodhpur, Red FM leh Decathlon platform-ah te pawh a lo inlan tawh a, tunah hian amah aia la naupang ve lehchhawng te chu hula hoop tihdan a zirtir thin a, hula hoop workshop trainer naupang ber a tih theih bawk ang.
Sinaya hian YouTube-ah tutorials te dahin, India-a naupang tam zawkin hula hoop an lo tuipui theih nan hma a la ve a, hula hoop chu hlimawm leh fitness atana tha bawk si niin, naupang te tana taksa hriselna leh zirlai thlengin rilru tichak thei ni a ngaih thu a sawi.