Elton John leh a band-in touring history siamin Billboard Award an dawng

Elton John leh a band-in touring history siamin Billboard Award an dawng
Elton John leh a band te chuan kum kalta atanga an tan Farewell Yellow Brick Road Tour chuan touring atanga sum lalut hnem record an siam a, an record siam pual hian Phil Anschutz, Jay Marciano leh AEG te chuan Elton John AIDS Foundation tan dollar maktaduai khat an thawh. He tour hian a tawp lam a hnaih tawh a, show vawi 15 an la hmakbak a ni.
Farewell Yellow Brick Road Tour an neih chhung hian ticket maktaduai 5.7 hralh tawhin, ticket hralhna atanga an sum hmuh pawh dollar maktaduai 887 a tling tawh a, Billboard Boxscore-in a report danin hei hi khawvela tour neih tawha sum lalut hnem ber a la ni.
Hetihian Elton John hi solo artist zinga tour ticket hralh hnem ber leh, solo artist zingah tour atanga sum lalut hnem ber niin, a tour neih tawh zawng zawnga ticket a hralh tawh hi maktaduai 20 chuang a ni tawh a, a tour neih tawh ho atanga a sum hmuh pawh dollar tluklehdingawn 2 a tling thuak tawh bawk a ni.
Elton John chuan Billboard editorial director Hannah Karp hnen atanga award pahnih dawn pahin, “Bul ka tan khan rimawi han tum ve hrim hrim kha ka chak a ni mai a, tour atanga sum lalut hnem ber tih lampang hi chu suangtuahnaah pawh la awm ngai lo a ni,” tiin a hmaa he record siamtu Ed Sheeran a khum tak chungchang fiamthu a sawi langin, “Ed Sheeran chu a lungawi lo ngawt ang,” a ti zauh bawk.